ਜਲੰਧਰ, 25 ਮਾਰਚ – ਇਸ ਸ਼ਹਿਰ ਦੇ ਕਬੀਰ ਨਗਰ ਵਾਸੀ ਭਾਰਤੀ ਭਗਤ ਨੇ ਡੀ ਸੀ ਘਨਸ਼ਾਮ ਥੋਰੀ ਨੂੰ ਸ਼ਿਕਾਇਤ ਦੇ ਕੇ ਕਲਰਕ ਮੀਨੂੰ ਉੱਤੇ 40 ਹਜ਼ਾਰ ਰੁਪਏ ਰਿਸ਼ਵਤ ਮੰਗਣ ਦਾ ਦੋਸ਼ ਲਾਇਆ ਹੈ।
ਭਾਰਤੀ ਨੇ ਕਿਹਾ ਕਿ ਉਹ ਡਾਕ ਵਿਭਾਗ ਵਿੱਚ ਮਾਲਟੀ ਟਾਸਕਿੰਗ ਸਟਾਫ ਦੀ ਨੌਕਰੀ ਕਰਦੀ ਹੈ ਅਤੇ ਇਸ ਸਮੇਂ ਜਲੰਧਰ ਦੇ ਸਿਟੀ ਹੈਡ ਆਫਿਸ ਵਿੱਚ ਤੈਨਾਤ ਹੈ। ਉਸ ਨੇ ਕਿਹਾ ਕਿ ਉਸ ਦੀ ਨੌਕਰੀ ਐਸ ਸੀ ਕੋਟੇ ਵਿੱਚੋਂ ਲੱਗੀ ਸੀ ਤੇ ਵਿਭਾਗੀ ਤੌਰ ਉੱਤੇ ਪ੍ਰਮੋਸ਼ਨ ਵੇਲੇ ਤਹਿਸੀਲਦਾਰ-1 ਤੋਂ ਐਸ ਸੀ ਸਰਟੀਫਿਕੇਟ ਦੀ ਵੈਰੀਫਿਕੇਸ਼ਨ ਮੰਗੀ ਸੀ। ਭਾਰਤੀ ਨੇ ਕਿਹਾ ਕਿ ਡਿਪਾਰਟਮੈਂਟ ਵੈਰੀਫਿਕੇਸ਼ਨ ਦੇ ਅਸਲੀ ਦਸਤਾਵੇਜ਼ ਐਸ ਸੀ ਸਰਟੀਫਿਕੇਟ ਜਾਰੀ ਕੀਤੇ ਗਏ ਸਨ। ਜਨਵਰੀ 2021 ਵਿੱਚ ਤਹਿਸੀਲਦਾਰ-1 ਦੇ ਦਫਤਰ ਨੂੰ ਵੈਰੀਫਿਕੇਸ਼ਨ ਲਈ ਭੇਜੇ ਪੇਪਰ ਅੱਜ ਤੱਕ ਵੈਰੀਫਾਈ ਨਹੀਂ ਕੀਤੇ ਗਏ। ਭਾਰਤੀ ਨੇ ਕਿਹਾ ਕਿ ਕੱਲ੍ਹ ਉਸਨੂੰ ਸਟਾਫ ਮੈਂਬਰ ਅਮਰਜੋਤ ਨੇ ਦੱਸਿਆ ਕਿ ਵੈਰੀਫਿਕੇਸ਼ਨ ਫਾਈਲ ਮੀਨੂੰ ਕੋਲ ਹੈ ਅਤੇ ਉਸ ਦਾ ਨੰਬਰ ਦੇ ਦਿੱਤਾ। ਇਸ ਉੱਤੇ ਉਸ ਦੇ ਮੋਬਾਈਲ ਉੱਤੇ ਕਾਲ ਕੀਤੀ ਤਾਂ ਉਸ ਨੇ ਕਿਹਾ ਕਿ ਤਹਿਸੀਲਦਾਰ ਨਾਲ ਇਸ ਬਾਰੇ ਗੱਲ ਕਰਨੀ ਪਵੇਗੀ, ਫਾਈਲ ਮਿਲ ਨਹੀਂ ਰਹੀ ਤੇ ਕੁਝ ਦੇਰ ਬਾਅਦ ਗੱਲ ਕਰਨ ਨੂੰ ਕਿਹਾ। ਭਾਰਤੀ ਨੇ ਕਿਹਾ ਕਿ ਉਸ ਨੇ ਜਦ ਪੰਜ ਮਿੰਟ ਬਾਅਦ ਦੋਬਾਰਾ ਫੋਨ ਕੀਤਾ ਤਾਂ ਉਕਤ ਮੈਡਮ ਨੇ ਕਿਹਾ ਕਿ ਜੇ ਤੁਸੀਂ ਕੇਸ ਪਾਸ ਕਰਵਾਉਣਾ ਚਾਹੁੰਦੇ ਹੋ ਤਾਂ 40 ਹਜ਼ਾਰ ਰੁਪਏ ਦੇਣੇ ਪੈਣਗੇ, ਨਹੀਂ ਤਾਂ ਰਿਪੋਰਟ ਕਰ ਦਿੱਤੀ ਜਾਏਗੀ ਕਿ ਰਿਕਾਰਡ ਨਹੀਂ ਮਿਲ ਰਿਹਾ, ਜਿਸ ਦੇ ਕਾਰਨ ਤੁਹਾਨੂੰ ਨੌਕਰੀ ਵਿੱਚ ਪ੍ਰੇਸ਼ਾਨੀ ਹੋਵੇਗੀ।ਉਨ੍ਹਾਂ ਦਸਿਆ ਕਿ ਸਾਰੀ ਗੱਲਬਾਤ ਦੀ ਰਿਕਾਰਡਿੰਗ ਮੌਜੂਦ ਹੈ ਅਤੇ ਜਾਂਚ ਏਜੰਸੀ ਜਾਂ ਅਧਿਕਾਰੀ ਉਕਤ ਰਿਕਾਰਡਿੰਗ ਦੀ ਮੰਗ ਕਰਦੇ ਹਨ ਤਾਂ ਉਨ੍ਹਾਂ ਨੂੰ ਇਹ ਪੇਸ਼ ਕੀਤੀ ਜਾ ਸਕਦੀ ਹੈ।

Read More Daily Punjab Times