ਸਿਰਸਾ, 5 ਅਪ੍ਰੈਲ – ਵਿਸ਼ੇਸ਼ ਜਾਂਚ ਟੀਮ (ਐਸ ਆਈ ਟੀ)ਸਿਰਸਾ ਵੱਲੋਂ 15 ਹਜ਼ਾਰ ਕੁਇੰਟਲ ਕਣਕ ਘੋਟਾਲੇ ਕਰਨ ਵਾਲੇ ਅਧਿਕਾਰੀਆਂ ਅਤੇ ਮੁਲਾਜ਼ਮਾਂ ਦੀ ਫੜੋ-ਫੜੀ ਜਾਰੀ ਹੈ।
ਇਸ ਸੰਬੰਧ ਵਿੱਚ ਐਸ ਆਈ ਟੀ ਨੇ ਅਲੀਕਾਂ ਨਿਵਾਸੀ ਰਵੀ ਕੁਮਾਰ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ। ਦੱਸਿਆ ਜਾਂਦਾ ਹੈ ਕਿ ਰਵੀ ਕੁਮਾਰ ਨੇ ਫੂਡ ਸਪਲਾਈ ਵਿਭਾਗ ਸਿਰਸਾ ਤੋਂ ਸਾਲ 2014 ਵਿੱਚ ਡਿਪੂ ਲਿਆ ਸੀ ਅਤੇ ਉਸ ਦਾ ਨਾਂਅ ਕਣਕ ਸਮੇਤ ਹੋਰ ਖੁਰਾਕ ਪਾਦਰਥਾਂ ਦੇ ਗ਼ਬਨ ਕੇਸ ਵਿੱਚ ਸ਼ਾਮਲ ਹੈ। ਪੁਲਸ ਅਨੁਸਾਰ ਡਿਪੂ ਹੋਲਡਰ ਰਵੀ ਨੇ ਪੁਲਸ ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ ਕਿ ਉਸ ਨੇ ਗ਼ਬਨ ਦੀ ਰਾਸ਼ੀ ਨਾਲ ਬਾਈਪਾਸ ਸਰਜ਼ਰੀ ਕਰਵਾਈ ਸੀ, ਜਿਸ ਉਤੇ ਲੱਗਭਗ ਸੱਤ ਤੋਂ ਅੱਠ ਲੱਖ ਰੁਪਏ ਖਰਚ ਹੋਏ ਸਨ। ਉਸ ਨੇ ਜਾਂਚ ਅਧਿਕਾਰੀਆਂ ਨੂੰ ਇਹ ਵੀ ਦੱਸਿਆ ਕਿ ਉਸ ਨੇ ਪਿੰਡ ਮੁਸਾਹਿਬਵਾਲਾ ਵਿੱਚ ਇੱਕ ਪਲਾਟ ਵੀ ਖਰੀਦਿਆ ਹੈ। ਵਰਨਣ ਯੋਗ ਹੈ ਕਿ ਇਸ 15 ਹਜ਼ਾਰ ਕੁਇੰਟਲ ਕਣਕ ਘੋਟਾਲੇ ਵਿੱਚ 58 ਡਿਪੂ ਹੋਲਡਰਾਂ ਅਤੇ ਵਿਭਾਗ ਦੇ ਛੇ ਅਧਿਕਾਰੀਆਂ ਉਤੇ ਦੋਸ਼ ਹਨ। ਐਸ ਆਈ ਟੀ ਕਰੋੜਾਂ ਦੇ ਇਸ ਘੋਟਾਲੇ ਵਿੱਚ ਦੋਸ਼ੀਆਂ ਦੀ ਫੜੋਫੜੀ ਦੇ ਨਾਲ ਗ਼ਬਨ ਦੀ ਰਾਸ਼ੀ ਵਸੂਲਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਅਤੇਗ਼ਬਨ ਕਰਨ ਵਾਲਿਆਂ ਦੀ ਜਾਇਦਾਦ ਅਟੈਚ ਕਰਨ ਦੀ ਪ੍ਰਕਿਰਿਆ ਵੀ ਚੱਲ ਰਹੀ ਹੈ। ਇਸ ਮਾਮਲੇ ਵਿੱਚ ਸੀ ਆਈ ਏ ਇੰਪੈਕਟਰ ਪ੍ਰਦੀਪ ਕੁਮਾਰ ਦਾ ਕਹਿਣਾ ਹੈ ਕਿ ਡਿਪੂ ਹੋਲਡਰ ਨੂੰ ਕੋਰਟ ਵਿੱਚ ਪੇਸ਼ ਕਰਕੇ ਕਾਨੂੰਨੀ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ।

Read More Punjabi News Today