ਵਾਸ਼ਿੰਗਟਨ, 7 ਫਰਵਰੀ – ਅਮਰੀਕਾ ਵਿੱਚ ਪਾਕਿਸਤਾਨ ਦੇ ਇੱਕ ਸਾਬਕਾ ਡਿਪਲੋਮੈਟ ਹੁਸੈਨ ਹੱਕਾਨੀ ਨੇ ਕਿਹਾ ਹੈ ਕਿ ਅਮਰੀਕਾ ਅਤੇ ਤਾਲਿਬਾਨ ਵਿਚਾਲੇ ਹੋਏ ਸਮਝੌਤੇ ਦਾ ਸ਼ਾਂਤੀ ਨਾਲ ਕੋਈ ਸਬੰਧ ਨਹੀਂ ਤੇ ਇਹ ਮੂਲ ਰੂਪ `ਚ ਜੰਗ ਨਾਲ ਪੀੜਤ ਅਫਗਾਨਿਸਤਾਨ ਤੋਂ ਅਮਰੀਕੀ ਫੌਜ ਦੀ ਵਾਪਸੀ ਦਾ ਸਮਝੌਤਾ ਹੈ।
ਥਿੰਕ ਟੈਂਕ ‘ਹਡਸਨ ਇੰਸਟੀਚਿਊਟ’ਵੱਲੋਂ ‘ਅਫਗਾਨ ਸ਼ਾਂਤੀ ਪ੍ਰਕਿਰਿਆ; ਪ੍ਰਗਤੀ ਜਾਂ ਸੰਕਟ?’ ਵਾਲੇ ਵਿਸ਼ੇ ‘ਤੇ ਆਨਲਾਈਨ ਕਰਵਾਏ ਸਮਾਰੋਹ ਵਿੱਚ ਹੁਸੈਨ ਹੱਕਾਨੀ ਨੇ ਕਿਹਾ, ‘ਮੈਂ ਅਮਰੀਕਾ ਤੇ ਤਾਲਿਬਾਨ ਵਿਚਾਲੇ ਸਮਝੌਤੇ ਦਾ ਲੰਮੇ ਸਮੇਂ ਤੋਂ ਆਲੋਚਕ ਹਾਂ। ਮੇਰਾ ਮੰਨਣਾ ਹੈ ਕਿ ਇਸ ਸਮਝੌਤੇ ਦਾ ਸ਼ਾਂਤੀ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਤੇ ਇਹ ਸੁਰੱਖਿਆ ਫੋਰਸਾਂ ਦੀ ਵਾਪਸੀ ਦਾ ਸਮਝੌਤਾ ਹੈ। ਤਾਲਿਬਾਨ ਨੂੰ ਕੇਵਲ ਇੱਕ ਚੀਜ਼ ਦੀ ਵਚਨਬੱਧਤਾ ਜਾਹਰ ਕਰਨ ਨੂੰ ਕਿਹਾ ਗਿਆ ਹੈ ਉਹ ਆਖਰ-ਅਫਗਾਨ ਵਾਰਤਾ ਕਰਨਗੇ, ਨਾ ਕਿ ਉਹ ਸ਼ਾਂਤੀ ਲਈ ਸਹਿਮਤ ਹੋਣਗੇ।’
ਵਰਨਣ ਯੋਗ ਹੈ ਕਿ ਡੋਨਾਲਡ ਟਰੰਪ ਦੀ ਸਰਕਾਰ ਨੇ ਪਿਛਲੇ ਸਾਲ ਫਰਵਰੀ ਵਿੱਚ ਤਾਲਿਬਾਨ ਨਾਲ ਸਮਝੌਤਾ ਕੀਤਾ ਸੀ, ਜਿਸ ਵਿੱਚ ਅੱਤਵਾਦੀ ਗਰੁੱਪਾਂ ਵੱਲੋਂ ਸੁਰੱਖਿਆ ਦੀ ਗਾਰੰਟੀ ਬਦਲੇ ਅਫਗਾਨਿਸਤਾਨ ‘ਚੋਂ ਅਮਰੀਕੀ ਫੌਜ ਦੀ ਵਾਪਸੀ ਦੀ ਯੋਜਨਾ ਬਣਾਈ ਗਈ ਸੀ। ਹੱਕਾਨੀ ਨੇ ਕਿਹਾ ਕਿ ਤਾਲਿਬਾਨ ਦੀ ਸ਼ਾਂਤੀ ਦੇ ਅਰਥ ਅਮਰੀਕਾ ਦੇ ਅਰਥਾਂ ਤੋਂ ਬਹੁਤ ਅਲੱਗ ਹਨ। ਹਡਸਨ ਇੰਸਟੀਚਿਊਟ ਵਿੱਚ ਦੱਖਣੀ ਤੇ ਮੱਧ ਏਸ਼ੀਆ ਮਾਮਲਿਆਂ ਦੇ ਨਿਰਦੇਸ਼ਕ ਹੱਕਾਨੀ ਨੇ ਕਿਹਾ, ‘ਤਾਲਿਬਾਨ ਦਾ ਮੰਨਣਾ ਹੈ ਕਿ ਜਦ ਉਸ ਦੇ ਇਸਲਾਮੀ ਰਾਜ ਦੀ ਸਥਾਪਨਾ ਹੋ ਜਾਏਗੀ, ਤਦ ਸ਼ਾਂਤੀ ਸਥਾਪਤ ਹੋਵੇਗੀ।’