ਵਾਸ਼ਿੰਗਟਨ, 27 ਮਾਰਚ, -ਭਾਰਤ ਨੂੰ ਬੇਸ਼ੱਕ ਅਮਰੀਕਾ ਆਪਣਾ ਬਹੁਤ ਕਰੀਬੀ ਦੇਸ਼ ਕਹਿੰਦਾ ਰਹਿੰਦਾ ਹੈ, ਪਰ ਅਮਰੀਕਾ ਦੀ ਜੋਅ ਬਾਈਡੇਨ ਸਰਕਾਰ ਨੇ ਪਹਿਲੀ ਵਾਰ ਬਦਲੇ ਦੀ ਕਾਰਵਾਈ ਕਰ ਕੇ ਭਾਰਤ ਵਿਰੁੱਧ ਵੱਡਾ ਫੈਸਲਾ ਲਿਆ ਤੇ ਭਾਰਤ ਦੇ ਕਰੀਬ 40 ਸਾਮਾਨ ਉੱਤੇ 25 ਫੀਸਦੀ ਜਵਾਬੀ ਟੈਰਿਫ ਜਾਂ ਹੋਰ ਟੈਕਸ ਲਾਇਆ ਹੈ। ਇਹ ਟੈਕਸ ਝੀਂਗਾ ਮੱਛੀ, ਬਾਸਮਤੀ ਚਾਵਲ, ਸੋਨਾ-ਚਾਂਦੀ ਦੇ ਸਾਮਾਨਤੇ ਹੋਰ ਚੀਜ਼ਾਂ ਉੱਤੇ ਲਾਇਆ ਗਿਆ ਹੈ।
ਇਸ ਬਾਰੇ ਯੂਨਾਈਟਿਡ ਸਟੇਟਸ ਟਰੇਡ ਰਿਪ੍ਰੇਜ਼ੈਂਟੇਟਿਵ (ਯੂ ਐੱਸ ਟੀ ਆਰ) ਨੇ ਬੀਤੇ ਵੀਰਵਾਰ ਦੱਸਿਆ ਹੈ ਕਿ ਉਹ ਭਾਰਤੀ ਉਤਪਾਦਾਂ ਉੱਤੇਓਨੀ ਡਿਊਟੀ ਲਾਵੇਗਾ, ਜਿੰਨਾ ਟੈਕਸ ਭਾਰਤ ਡੀ ਐੱਸ ਟੀ ਅਧੀਨ ਲੈਂਦਾ ਹੈ। ਅਮਰੀਕਾ ਦਾ ਅਨੁਮਾਨ ਹੈ ਕਿ ਭਾਰਤ ਡੀ ਐੱਸ ਟੀ ਨਾਲ ਕਰੀਬ 55 ਮਿਲੀਅਨ ਡਾਲਰ ਸਲਾਨਾ ਟੈਕਸ ਵਸੂਲੀ ਕਰੇਗਾ। ਯੂ ਐੱਸ ਟੀ ਆਰ ਵੱਲੋਂ ਡਿਜੀਟਲ ਟੈਕਸ ਬਾਰੇ ਸੈਕਸ਼ਨ 301 ਦੀ ਜਾਂਚ ਦੇ ਅਗਲੇ ਪੜਾਅ ਵਿਚ ਕਿਹਾ ਗਿਆ ਹੈ ਕਿ ਅਮਰੀਕਾ 25 ਫੀਸਦੀ ਵਾਧੂ ਟੈਰਿਫ ਲਾਉਣ ਜਾ ਰਿਹਾ ਹੈ। ਭਾਰਤ ਤੋਂ ਇਲਾਵਾ ਆਸਟ੍ਰੀਆ, ਇਟਲੀ, ਸਪੇਨ, ਤੁਰਕੀ ਅਤੇ ਬ੍ਰਿਟੇਨ ਤੋਂ ਆਉਣ ਵਾਲੀਆਂ ਚੀਜ਼ਾਂ ਉੱਤੇ ਵੀ ਇਹ ਵਾਧੂ ਟੈਰਿਫ ਲਾਇਆ ਜਾਵੇਗਾ।
ਵਰਨਣ ਯੋਗ ਹੈ ਕਿ ਇਸੇ ਸਾਲ ਜਨਵਰੀ ਵਿਚ ਯੂ ਐੱਸ ਟੀ ਆਰ ਨੇ ਇਹ ਕਿਹਾ ਸੀ ਕਿ ਆਸਟ੍ਰੀਆ, ਭਾਰਤ, ਇਟਲੀ, ਸਪੇਨ, ਤੁਰਕੀ ਅਤੇ ਬ੍ਰਿਟੇਨ ਵੱਲੋਂ ਲਾਇਆ ਗਿਆ ਡਿਜੀਟਲ ਟੈਕਸ ਗਲਤ ਹੈ ਅਤੇ ਇਸ ਦੇ ਖਿਲਾਫ ਸੈਕਸ਼ਨ 301 ਹੇਠ ਕਾਰਵਾਈ ਕੀਤੀ ਜਾ ਸਕਦੀ ਹੈ, ਕਿਉਂਕਿ ਇਹ ਅਮਰੀਕਾ ਦੀਆਂ ਡਿਜੀਟਲ ਕੰਪਨੀਆਂ ਵੱਲ ਪੱਖਪਾਤ ਕਰਦਾ ਹੈ। ਯੂ ਐੱਸ ਟੀ ਆਰ ਨੇ ਕਿਹਾ ਸੀ ਕਿ ਇਹ ਡਿਜੀਟਲ ਟੈਕਸ ਅੰਤਰਰਾਸ਼ਟਰੀ ਟੈਕਸ ਸਿਧਾਂਤਾਂ ਦੀ ਪਾਲਣਾ ਨਹੀਂ ਕਰ ਰਿਹਾ। ਓਦੋਂ ਯੂ ਐੱਸ ਟੀ ਆਰ ਨੇ ਡਿਜੀਟਲ ਟੈਕਸ ਉੱਤੇ ਬਦਲੇ ਦੀ ਕਾਰਵਾਈ ਦੀ ਚਿਤਾਵਨੀ ਦਿੱਤੀ ਸੀ।
ਭਾਰਤ ਪਿਛਲੇ 1 ਅਪ੍ਰੈਲ 2020 ਤੋਂ ਇਕੁਏਲਾਈਜੇਸ਼ਨ ਲੇਵੀ ਵਸੂਲ ਰਿਹਾ ਹੈ, ਜਿਸ ਨੂੰ ਗੂਗਲ ਟੈਕਸ ਵਜੋਂਵੀ ਜਾਣਿਆ ਜਾਂਦਾ ਹੈ। ਯੂ ਐੱਸ ਟੀ ਆਰ ਨੇ 119 ਕੰਪਨੀਆਂ ਦੀ ਪਛਾਣ ਕੀਤੀ ਹੈ, ਜੋ ਡਿਜੀਟਲ ਸਰਵਿਸ ਟੈਕਸ ਦੇ ਘੇਰੇ ਵਿਚ ਆਉਂਦੀਆਂ ਹਨ, ਇਨ੍ਹਾਂ ਵਿਚੋਂ 86 ਫੀਸਦੀ ਅਮਰੀਕੀ ਕੰਪਨੀਆਂ ਹਨ। ਭਾਰਤ ਨੇ ਪਿਛਲੇ ਨਵੰਬਰ ਵਿਚ ਕਿਹਾ ਸੀ ਕਿ ਇਹ ਲੇਵੀ 2015 ਵਿਚ ਹੋਏ ਆਰਗੇਨਾਈਜ਼ੇਸ਼ਨ ਆਫ ਇਕਨਾਮਿਕ ਕੋਆਪਰੇਸ਼ਨ ਐਂਡ ਡਿਵੈਲਪਮੈਂਟ(ਓ ਸੀ ਈ ਡੀ: ਜੀ-20) ਦੀ ਰਿਪੋਰਟ ਦੇ ਆਧਾਰ ਉੱਤੇ ਲਾਈ ਗਈ ਹੈ। ਯੂ ਐੱਸ ਟੀ ਆਰ ਡਿਜੀਟਲ ਸਰਵਿਸ ਟੈਕਸ ਬਾਰੇ 10 ਦੇਸ਼ਾਂ ਵਿਰੁੱਧ ਜਾਂਚ ਕਰ ਰਿਹਾ ਹੈ, ਜਿਨ੍ਹਾਂ ਵਿਚ ਭਾਰਤ, ਬ੍ਰਿਟੇਨ, ਬ੍ਰਾਜ਼ੀਲ, ਯੂਰਪੀਨ ਯੂਨੀਅਨ, ਇਟਲੀ ਅਤੇ ਤੁਰਕੀ ਸ਼ਾਮਲ ਹਨ। ਏਸੇ ਤਰ੍ਹਾਂ ਯੂ ਐੱਸ ਟੀ ਆਰ ਨੇ ਡਿਜੀਟਲ ਟੈਕਸ ਦੇ ਵਿਰੋਧ ਵਿਚ ਫਰਾਂਸ ਤੋਂ ਆਉਂਦੀਆਂ ਚੀਜ਼ਾਂ ਉੱਤੇ 25 ਫੀਸਦੀ ਟੈਰਿਫ ਲਾਇਆ ਹੈ, ਜਿਨ੍ਹਾਂਵਿਚ ਕਾਸਮੈਟਿਕਸ, ਹੈਂਡ ਬੈਗਸ ਆਦਿ ਵੀ ਸ਼ਾਮਲ ਹਨ। ਇਸ ਟੈਰਿਫ ਦੀ ਕੁੱਲ ਕੀਮਤ 1.3 ਬਿਲੀਅਨ ਡਾਲਰ ਦੱਸੀ ਗਈ ਹੈ, ਇਸ ਕੁਲੈਕਸ਼ਨ ਤੈਅ ਤਰੀਕਸਪੱਸ਼ਟ ਨਹੀਂ ਹੋ ਸਕੀ।

Read More World News in Punjabi