ਜਲੰਧਰ, 31 ਜਨਵਰੀ – ਥਾਣਾ ਆਦਮਪੁਰ ਦੇ ਪਿੰਡ ਕਾਲਰਾ ਦੇ ਵਾਸੀ ਨੌਜਵਾਨ ਤੋਂ ਟਰੈਵਲ ਏਜੰਟ ਨੇ ਤਿੰਨ ਮਹੀਨੇ ਵਿੱਚ ਕੈਨੇਡਾ ਭੇਜਣ ਦਾ ਕਹਿ ਕੇ ਕਰੀਬ ਤਿੰਨ ਲੱਖ ਰੁਪਏ ਠੱਗ ਲਏ। ਇਸ ਪਿੱਛੋਂ ਰੂਰਲ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਦੇ ਆਧਾਰ `ਤੇ ਪੁਲਸ ਨੇ ਦੋਸ਼ੀ ਦੇ ਖਿਲਾਫ ਪਰਚਾ ਦਰਜ ਕਰ ਲਿਆ ਹੈ।
ਪਿੰਡ ਕਾਲਰਾ ਦੇ ਦਲਜੀਤ ਸਿੰਘ ਨੇ ਕਿਹਾ ਕਿ ਉਸ ਦੇ ਰਿਸ਼ਤੇਦਾਰ ਲਖਵੀਰ ਸਿੰਘ ਨੇ ਉਸ ਨੂੰ ਟਰੈਵਲ ਏਜੰਟ ਪਰਵਿੰਦਰ ਸਿੰਘ ਨਾਲ ਮਿਲਵਾਇਆ ਸੀ, ਜੋ ਪਹਿਲਾਂ ਹੁਸ਼ਿਆਰਪੁਰ ਦੇ ਗੜ੍ਹਸ਼ੰਕਰ ਦੇ ਜੌੜਾ ਮੁਹੱਲਾ ਵਿੱਚ ਰਹਿੰਦਾ ਸੀ, ਪਰ ਅੱਜਕੱਲ੍ਹ ਸ਼ਹੀਦ ਭਗਤ ਸਿੰਘ ਨਗਰ ਦੇ ਪਿੰਡ ਜਿੰਦੋਵਾਲ ਬੰਗਾ ਵਿੱਚ ਰਹਿੰਦਾ ਹੈ। ਪਰਵਿੰਦਰ ਉਨ੍ਹਾਂ ਦੇ ਰਿਸ਼ਤੇਦਾਰ ਲਖਵੀਰ ਦੇ ਨਾਲ ਉਨ੍ਹਾਂ ਦੇ ਘਰ ਗਿਆ ਤਾਂ ਉਸ ਨੇ ਉਸ ਨੂੰ ਕੈਨੇਡਾ ਭੇਜਣ ਦਾ ਭਰੋਸਾ ਦਿੱਤਾ ਅਤੇ 12 ਲੱਖ ਰੁਪਏ ਵਿੱਚ ਸੌਦਾ ਤੈਅ ਹੋ ਗਿਆ। ਉਸ ਨੇ ਕਿਹਾ ਕਿ 3 ਮਹੀਨੇ ਵਿੱਚ ਕੈਨੇਡਾ ਪੁਚਾ ਦੇਵੇਗਾ। ਉਸ ਵਕਤ ਉਹ 35 ਹਜ਼ਾਰ ਕੈਸ਼ ਅਤੇ ਪਾਸਪੋਰਟ ਲੈ ਗਿਆ ਅਤੇ ਕਿਹਾ ਕਿ ਜਿਵੇਂ-ਜਿਵੇਂ ਕੰਮ ਹੰੁਦਾ ਜਾਏ, ਉਹ ਪੈਸੇ ਲੈਂਦਾ ਰਹੇਗਾ। ਇਸ ਦੇ ਬਾਅਦ ਉਸ ਨੇ ਅੱਠ ਕਿਸ਼ਤਾਂ ਵਿੱਚ ਕਦੇ 10 ਹਜ਼ਾਰ, ਕਦੇ 20 ਹਜ਼ਾਰ ਤੇ ਕਦੇ ਪੰਜਾਹ ਹਜ਼ਾਰ ਕਰ ਕੇ 2.65 ਲੱਖ ਰੁਪਏ ਉਸ ਦੇ ਖਾਤੇ ਵਿੱਚ ਟਰਾਂਸਫਰ ਕਰ ਦਿੱਤੇ। ਤਿੰਨ ਲੱਖ ਰੁਪਏ ਲੈਣ ਪਿੱਛੋਂ ਉਹ ਟਾਲਮਟੋਲ ਕਰਨ ਲੱਗਾ ਅਤੇ ਸੱਤ ਮਹੀਨੇ ਬੀਤ ਗਏ। ਦਲਜੀਤ ਨੇ ਉਸ ਨੂੰ ਕਿਹਾ ਕਿ ਜੇ ਵੀਜ਼ਾ ਨਹੀਂ ਲੱਗਦਾ ਤਾਂ ਪੈਸੇ ਮੋੜ ਦੇਵੇ, ਕਿਉਂਕਿ ਕਰਜ਼ਾ ਲੈ ਕੇ ਪੈਸੇ ਦਿੱਤੇ ਹਨ। ਇਹ ਸੁਣ ਕੇ ਟਰੈਵਲ ਏਜੰਟ ਪਰਵਿੰਦਰ ਨੇ ਕਿਹਾ ਕਿ ਉਨ੍ਹਾਂ ਦੇ ਪੈਸੇ ਮੋੜ ਦੇਵੇਗਾ, ਪਰ ਇਸ ਪਿੱਛੋਂ ਫੋਨ ਚੁੱਕਣਾ ਬੰਦ ਕਰ ਦਿੱਤਾ। ਦੋਸ਼ੀ ਦੇ ਘਰ ਗਏ ਤਾਂ ਉਹ ਗਾਇਬ ਸੀ। ਕੁਝ ਦਿਨ ਬਾਅਦ ਉਹ ਅਚਾਨਕ ਪਹੁੰਚੇ ਤਾਂ ਦੋਸ਼ੀ ਮਿਲ ਗਿਆ। ਉਸ ਨੇ 1.50 ਲੱਖ ਦਾ ਚੈਕ ਦਿੱਤਾ ਅਤੇ ਬਾਕੀ ਰਕਮ ਬਾਅਦ ਵਿੱਚ ਵਾਪਸ ਮੋੜਨ ਦੀ ਗੱਲ ਕਹੀ। ਉਨ੍ਹਾਂ ਨੇ ਚੈਕ ਬੈਂਕ ਵਿੱਚ ਲਾਇਆ ਤਾਂ ਬਾੳਂਂਸ ਹੋ ਗਿਆ। ਇਸ ਦੇ ਬਾਅਦ ਟਰੈਵਲ ਏਜੰਟ ਨਾਲ ਉਨ੍ਹਾਂ ਦਾ ਕੋਈ ਸੰਪਰਕ ਨਹੀਂ ਹੋਇਆ।