ਨਵੀਂ ਦਿੱਲੀ, 7 ਫਰਵਰੀ – ਨਵੇਂ ਖੇਤੀ ਕਾਨੂੰਨ ਦੇ ਵਿਰੁੱਧ 26 ਜਨਵਰੀ ‘ਤੇ ਰਾਜਧਾਨੀ ਦਿੱਲੀ ਵਿੱਚ ਹੰਗਾਮਾ ਕਰਨ ਵਾਲਿਆਂ ‘ਤੇ ਪੁਲਸ ਦਾ ਸ਼ਿਕੰਜਾ ਕਸਦਾ ਜਾਂਦਾ ਹੈ। ਉਤਰੀ ਜ਼ਿਲ੍ਹੇ ਦੇ ਵਿਸ਼ੇਸ਼ ਜਾਂਚ ਦਲ (ਐਸ ਆਈ ਟੀ) ਨੇ ਟਰੈਕਟਰ ਟਰਾਲੀ ਰੈਲੀ ਦੌਰਾਨ ਬੁਰਾੜੀ ਵਿੱਚ ਹੰਗਾਮਾ ਕਰਨ ਵਾਲੇ ਤਿੰਨ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਪੁਲਸ ਮੁਤਾਬਕ ਫੜੇ ਗਏ ਦੋਸ਼ੀਆਂ ਦੀ ਪਛਾਣ ਸ਼ਾਮ ਨਗਰ ਐਕਸਟੈਂਸ਼ਨ ਵਾਸੀ ਹਰਪਾਲ ਸਿੰਘ, ਚੰਦ ਨਗਰ ਵਾਸੀ ਹਰਜੀਤ ਸਿੰਘ ਅਤੇ ਤਿਲਕ ਨਗਰ ਦੇ ਧਰਮਿੰਦਰ ਸਿੰਘ ਦੇ ਰੂਪ ਵਿੱਚ ਹੋਈ ਹੈ। ਇਹ ਤਿੰਨੇ ਵਾਰਦਾਤ ਵਾਲੇ ਦਿਨ ਟਰੈਕਟਰ ਰੈਲੀ ਦੇ ਸਮਰਥਨ ਵਿੱਚ ਬੁਰਾੜੀ ਦੇ ਰਸਤੇ ਲਾਲ ਕਿਲ੍ਹੇਵੱਲ ਜਾ ਰਹੇ ਸਨ। ਦੋਸ਼ੀਆਂ ਦੇ ਕੋਲੋਂ ਵਾਰਦਾਤ ਵਿੱਚ ਵਰਤੇ ਮੋਟਰ ਸਾਈਕਲ, ਸਕੂਟੀ, ਮੋਬਾਈਲ ਫੋਨ ਬਰਾਮਦ ਕੀਤੇ ਗਏ ਹਨ। ਉਨ੍ਹਾਂ ਦੇ ਫੋਨ ਵਿੱਚ ਹਿੰਸਾ ਨਾਲ ਸਬੰਧਤ ਵੀਡੀਓ ਮਿਲੇ ਹਨ। ਪੁਲਸ ਉਨ੍ਹਾਂ ਤੋਂ ਪੁੱਛਗਿੱਛ ਕਰ ਕੇ ਘਟਨਾ ਵਿੱਚ ਸ਼ਾਮਲ ਹੋਰਨਾਂ ਲੋਕਾਂ ਦੀ ਪਛਾਣ ਵਿੱਚ ਲੱਗ ਗਈ ਹੈ। ਪੁਲਸ ਦੇ ਸੀਨੀਅਰ ਅਧਿਕਾਰੀਆਂ ਮੁਤਾਬਕ 26 ਜਨਵਰੀ ਨੂੰ ਟਰੈਕਟਰ ਰੈਲੀ ਦੇ ਦੌਰਾਨ ਉਤਰੀ ਜ਼ਿਲ੍ਹੇ ਵਿੱਚ ਜਗ੍ਹਾ-ਜਗ੍ਹਾ ਪੁਲਸ ਤੈਨਾਤ ਸੀ। ਸਿੰਘੂ ਬਾਰਡਰ ਤੋਂ ਅੰਦੋਲਨਕਾਰੀ ਮੁਕਰਬਾ ਚੌਕ ਹੁੰਦੇ ਹੋਏ ਲਾਲ ਕਿਲ੍ਹੇ ਵੱਲ ਵਧ ਰਹੇ ਸਨ। ਬੁਰਾੜੀ ਫਲਾਈਓਵਰ ਨੇੜੇ ਪੁਲਸ ਨੇ ਰੋਕਣਾਚਾਹਿਆ ਤਾਂ ਅੰਦੋਲਨਕਾਰੀਆਂ ਨੇ ਹਮਲਾ ਕਰ ਦਿੱਤਾ।

Read More Latest Punjabi News