ਮੋਟੇਂਗਟ, 3 ਫਰਵਰੀ – ਅਮਰੀਕਾ ਦੇ ਲੁਸਿਆਨਾ ਚ ਰੇਪ ਪੀੜਤਾ ਨੂੰ ਮਾਰਨ ਗਏ ਬਦਮਾਸ਼ਾਂ ਨੇ ਉਸ ਦੀ ਭੈਣ ਤੇ ਗੁਆਂਢੀ ਨੂੰ ਮਾਰ ਦਿੱਤਾ, ਜਿਸ ਬਾਰੇ ਪੁਲਸ ਅਗਲੀ ਕਾਰਵਾਈ ਕਰ ਰਹੀ ਹੈ। ਬਲਾਤਕਾਰ ਦੇ ਦੋਸ਼ੀ ਬੇਆਕਸ ਕੋਮਰੀਅਰ (35) ਨੇ ਆਪਣੇ ਗੁਨਾਹ ਤੋਂ ਬਚਣ ਦੇ ਲਈ ਪੀੜਤਾ ਦੇ ਕਤਲ ਦੀ ਸਾਜ਼ਿਸ਼ ਰਚੀ। ਇਸ ਲਈ ਉਸ ਨੇ ਦੋ ਬਦਮਾਸ਼ਾਂ ਨੂੰ ਪੀੜਤ ਲੜਕੀ ਦੇ ਕਤਲ ਦੀ ਸੁਪਾਰੀ ਦਿੱਤੀ ਸੀ। ਪੁਲਸ ਨੇ ਕਾਤਲਾਂ ਐਂਡਰਿਊ ਐਸਕਿਨੇ (25), ਡਾਲਵਿਨ ਵਿਲਸਨ (22) ਨੂੰ ਫੜ ਲਿਆ ਹੈ। ਕੋਮਰੀਅਰ ਨੂੰ ਪਹਿਲਾਂ ਵਰਮਿਲੀਅਨ ਪੈਰਿਸ਼ਚ ਰੇਪ ਦੇ ਦੋਸ਼ `ਚ ਗ਼੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਉਸ ਨੇ ਉਸ ਉਤੇ ਦੋਸ਼ ਲਾਉਣ ਵਾਲੀ ਔਰਤ ਨੂੰ ਮਾਰਨ ਲਈ ਐਸਕਿਨੇ ਤੇ ਵਿਲਸਨ ਨੂੰ ਸੁਪਾਰੀ ਦਿੱਤੀ ਤਾਂ ਕਿ ਪੀੜਤ ਔਰਤ ਉਸ ਦੇ ਖ਼ਿਲਾਫ਼ ਗਵਾਹੀ ਨਾ ਦੇ ਸਕੇ। ਪੁਲਸ ਨੇ ਦੱਸਿਆ ਕਿ ਐਸਕਿਨੇ ਤੇ ਵਿਲਸਨ ਪੀੜਤਾ ਦੇ ਘਰ ਗਏ ਅਤੇ ਉਸ ਬਾਰੇ ਪੁੱਛਿਆ। ਪੀੜਤਾ ਦੀ ਭੈਣ ਬ੍ਰਿਟਨੀ (34) ਨੇ ਉਨ੍ਹਾਂ ਨੂੰ ਕਿਹਾ ਕਿ ਉਹੀ ਉਹ ਔਰਤ ਹੈ, ਜਿਸ ਨੂੰ ਉਹ ਲੱਭਦੇ ਹਨ। ਫਿਰ ਉਨ੍ਹਾਂ ਨੇ ਬ੍ਰਿਟਨੀ ਦਾ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ। ਪੀੜਤਾ ਦੇ ਗੁਆਂਢੀ ਹੋਪ ਨੇਟਲਟਨ (37) ਨੇ ਦੋਵਾਂ ਨੂੰ ਰੋਕਣ ਕੋਸ਼ਿਸ਼ ਕੀਤੀ ਤਾਂ ਬਦਮਾਸ਼ਾਂ ਨੇ ਉਸ ਨੂੰ ਵੀ ਮਾਰ ਦਿੱਤਾ।