ਜਗਰਾਓਂ, 4 ਫਰਵਰੀ – ਮਾਮੇ ਦੀ ਨਾਬਾਲਗ ਕੁੜੀ ਨਾਲ ਬਲਾਤਕਾਰ ਕਰਨ ਅਤੇ ਗਰਭਵਤੀ ਹੋਣ `ਤੇ ਬਾਲ ਵਿਆਹ ਕਰਨ ਦੇ ਦੋਸ਼ ਵਿੱਚ ਪੁਲਸ ਨੇ ਡੇਢ ਸਾਲ ਪਿੱਛੋਂ ਬਾਲ ਵਿਆਹ ਕਰਨ ਵਾਲੇ ਲਾੜੇ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ, ਪਰ ਵਿਆਹ ਕਰਾਉਣ ਵਾਲੇ ਪਾਸਟਰ ਅਤੇ ਮਾਪਿਆਂ ਖਿਲਾਫ ਕੋਈ ਕਾਰਵਾਈ ਨਹੀਂ ਕੀਤੀ।
ਸੁਧਾਰ ਥਾਣੇ ਦੇ ਪਿੰਡ ਵਿੱਚ ਭੂਆ ਦੇ ਘਰ ਰਹਿੰਦੀ ਨਾਬਾਲਗਾ ਨੂੰ ਮਾਮੇ ਦੇ ਪੁੱਤ ਨੇ ਕਈ ਮਹੀਨੇ ਤੱਕ ਹਵਸ ਦਾ ਸ਼ਿਕਾਰ ਬਣਾਇਆ ਸੀ। ਪਰਵਾਰ ਨੂੰ ਇਸ ਦਾ ਪਤਾ ਓਦੋਂ ਲੱਗਾ, ਜਦੋਂ ਨਾਬਾਲਗਾ ਗਰਭਵਤੀ ਹੋ ਗਈ। ਇਸ ਉਤੇ ਮੁੰਡੇ ਦੇ ਮਾਂ-ਬਾਪ ਨੇ ਪੁੱਤ ਨੂੰ ਬਲਾਤਕਾਰ ਕੇਸ ਵਿੱਚੋਂ ਬਚਾਉਣ ਲਈ ਪਾਸਟਰ ਨਾਲ ਗੰਢ-ਤੁਪ ਕਰ ਕੇ ਚਰਚ ਵਿੱਚ ਜਾ ਕੇ ਵਿਆਹ ਕਰਵਾ ਦਿੱਤਾ। ਕੁੜੀ ਉਸ ਸਮੇਂ ਨਾਬਾਲਗ ਸੀ।ਨਾਬਾਲਗਾ ਨਾਲ ਰਿਸ਼ਤੇਦਾਰੀ ਵਿੱਚ ਭਰਾ ਲੱਗਦੇ ਨੌਜਵਾਨ ਵੱਲੋਂ ਬਲਾਤਕਾਰ ਕਰਨ ਤੇ ਨਾਬਾਲਗਾ ਦਾ ਉਸੇ ਨਾਲ ਵਿਆਹ ਰਚਾਉਣ ਬਾਰੇ ਜਦੋਂ ਪਿੰਡ ਨਵੀਂ ਆਬਾਦੀ ਅਕਾਲਗੜ੍ਹ ਦੇ ਪੰਚ ਰਜਿੰਦਰ ਸਿੰਘ ਨੂੰ ਪਤਾ ਲੱਗਾ ਤਾਂ ਉਸ ਨੇ ਦੋਸ਼ੀਆਂ ਨੂੰ ਸਜ਼ਾ ਦਿਵਾਉਣ ਲਈ ਸਾਲ 2019 ਵਿੱਚ ਪੁਲਸ ਨੂੰ ਸ਼ਿਕਾਇਤ ਦਿੱਤੀ। ਇਸ ਕੇਸ ਵਿੱਚ ਇੱਕ ਸਿਆਸਤਦਾਨ ਨੇ ਦੋਸ਼ੀ ਪਰਵਾਰ ਦਾ ਪੱਖ ਲੈਂਦਿਆਂ ਕਾਨੂੰਨੀ ਸ਼ਿਕੰਜਾ ਕੱਸਣ ਨਾ ਦਿੱਤਾ ਤੇ ਫਾਈਲ, ਪੁਲਸ ਦਫਤਰਾਂ ਵਿੱਚ ਦੱਬ ਕੇ ਰਹਿ ਗਈ ਸੀ।ਕਾਰਵਾਈ ਲਈ ਜੱਦੋਜਹਿਦ ਕਰਦੇ ਰਹੇ ਪੰਚ ਰਜਿੰਦਰ ਸਿੰਘ ਨੇ ਇਸ ਮਗਰੋਂ ਬਾਲ ਵਿਕਾਸ ਵਿਭਾਗ ਦੇ ਮੰਤਰੀ ਅਰੁਣਾ ਚੌਧਰੀ ਅਤੇ ਪੁਲਸ ਵੱਡੇ ਅਧਿਕਾਰੀਆਂ ਤੱਕ ਗੱਲ ਪੁਚਾਈ ਤਾਂ ਪੁਲਸ ਨੇ ਬਲਾਤਕਾਰ ਤੇ ਵਿਆਹ ਕਰਨ ਵਾਲੇ ਸਾਹਿਲ ਪੁੱਤਰ ਅਨਿਲ ਕੁਮਾਰ ਉੱਤੇ ਕੇਸ ਦਰਜ ਕਰ ਲਿਆ ਹੈ।