ਨਵੀਂ ਦਿੱਲੀ, 10 ਮਾਰਚ – ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਨੇ ਉਤਰ ਪ੍ਰਦੇਸ਼ ਵਿੱਚ ਬਹੁਜਨ ਸਮਾਜ ਪਾਰਟੀ ਦੇ ਸਾਬਕਾ ਵਿਧਾਨ ਪ੍ਰੀਸ਼ਦ ਮੈਂਬਰ ਮੁਹੰਮਦ ਇਕਬਾਲ ਅਤੇ ਉਨ੍ਹਾਂ ਦੇ ਪਰਵਾਰ ਦੀਆਂ ਸੱਤ ਖੰਡ ਮਿੱਲਾਂ ਜ਼ਬਤ ਕਰ ਲਈਆਂ ਹਨ। ਕੇਂਦਰੀ ਏਜੰਸੀ ਨੇ ਇਹ ਕਾਰਵਾਈ ਮਨੀ ਲਾਂਡਰਿੰਗ ਕੇਸ ਤਹਿਤ ਕੀਤੀ ਅਤੇ 1097 ਕਰੋੜ ਰੁਪਏ ਦੀਆਂ ਮਿੱਲਾਂ ਜ਼ਬਤ ਕੀਤੀਆਂ ਜਾਣ ਦਾ ਪਤਾ ਲੱਗਾ ਹੈ।
ਮਿਲੀ ਸੂਚਨਾ ਅਨੁਸਾਰ ਈ ਡੀ ਨੇ ਮਨੀ ਲਾਂਡਰਿੰਗ ਵਿਰੋਧੀ ਕਾਨੂੰਨ (ਪੀ ਐਮ ਐਲ ਏ) ਹੇਠਜਾਇਦਾਦ ਜ਼ਬਤ ਕਰਨ ਦੇ ਹੁਕਮ ਲਖਨਊ ਵਾਲੇ ਜ਼ੋਨਲ ਦਫਤਰ ਤੋਂ ਜਾਰੀ ਕੀਤੇ ਹਨ। ਮੁਹੰਮਦ ਇਕਬਾਲ ਦੀ ਮਾਲਕੀ ਵਾਲੀਆਂ ਮਿੱਲਾਂ ਕੁਸ਼ੀਨਗਰ, ਬਰੇਲੀ, ਦਿਓਰੀਆ, ਹਰਦੋਈ ਤੇ ਬਾਰਾਬਾਂਕੀ ਜ਼ਿਲ੍ਹਿਆਂ ਵਿੱਚ ਹਨ। ਇਹ ਮਿੱਲਾਂ ਸਾਲ 2010-11 ਦੌਰਾਨ ਇਕਬਾਲ ਅਤੇ ਉਸ ਦੇ ਪਰਵਾਰ ਨੂੰ ਇਨਵੈਸਟਮੈਂਟ, ਵਿਕਰੀ ਪ੍ਰਕਿਰਿਆ ਤਹਿਤ ਸਿਰਫ 6028 ਕਰੋੜ ਰੁਪਏ ਵਿੱਚ ਦੇ ਦਿੱਤੀਆਂ ਗਈਆਂ ਸਨ। ਈ ਡੀ ਨੇ ਦੋਸ਼ ਲਾਇਆ ਹੈ ਕਿ ਇਹ ਫਰਜ਼ੀ ਕੰਪਨੀਆਂ ਦੇ ਨਾਂਅ ਉਤੇ ਖਰੀਦੀਆਂ ਗਈਆਂ ਸਨ, ਜੋ ਅਸਲ ਵਿੱਚ ਮੁਹੰਮਦ ਇਕਬਾਲ ਜਾਂ ਉਨ੍ਹਾਂ ਦੇ ਪਰਵਾਰਕ ਮੈਂਬਰਾਂ ਦੀਆਂ ਸਨ। ਈ ਡੀ ਦੇ ਜਾਇੰਟ ਡਾਇਰੈਕਟਰ (ਲਖਨਊ) ਰਾਜੇਸ਼ਵਰ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮਾਂ ਨੇ ਫਰਜ਼ੀ ਕੰਪਨੀਆਂ ਰਾਹੀਂ ਕਾਲੇ ਧਨ ਨੂੰ ਸਫੈਦ ਕੀਤਾ। ਏਜੰਸੀ ਨੇ ਪਿਛਲੇ ਸਾਲ ਅਕਤੂਬਰ ਵਿੱਚ ਵੀ ਸਹਾਰਨਪੁਰ ਆਧਾਰਤ ਇਕਬਾਲ ਦੇ ਟਿਕਾਣਿਆਂ ਉਤੇ ਛਾਪੇ ਮਾਰੇ ਸਨ। ਈ ਡੀ ਅਤੇ ਸੀ ਬੀ ਆਈ ਇਸ ਸਾਬਕਾ ਵਿਧਾਇਕ ਖਿਲਾਫ ਕੇਸ ਦਰਜ ਕਰ ਕੇ ਮਾਮਲੇ ਦੀ ਜਾਂਚ ਕਰ ਰਹੀਆਂ ਹਨ।

Read More Exclusive Punjabi Breaking News