ਲੰਡਨ, 8 ਮਾਰਚ, – ਬ੍ਰਿਟੇਨ ਦੇ ਸ਼ਾਹੀ ਪਰਿਵਾਰ ਤੋਂ ਵੱਖ ਹੋਣ ਦਾ ਐਲਾਨ ਕਰ ਚੁੱਕੇ ਪ੍ਰਿੰਸ ਹੈਰੀ ਅਤੇ ਉੁਨ੍ਹਾਂ ਦੀ ਪਤਨੀ ਮੇਗਨ ਮਰਕਲ ਇਕ ਵਾਰ ਫਿਰ ਸੁਰਖੀਆਂ ਵਿੱਚ ਹਨ ਅਤੇ ਇਨ੍ਹਾਂ ਦੋਵਾਂ ਨੇ ਇਕ ਟੀਵੀ ਇੰਟਰਵਿਊ ਵਿੱਚ ਸ਼ਾਹੀ ਪਰਵਾਰ ਬਾਰੇ ਹੈਰਾਨ ਕਰਨ ਵਾਲੇ ਖੁਲਾਸੇ ਕੀਤੇ ਹਨ।
ਮੇਗਨ ਮਰਕਲ ਨੇ ਇਸ ਇੰਟਰਵਿਊ ਵਿੱਚ ਦੋਸ਼ ਲਾਇਆ ਹੈ ਕਿ ਸ਼ਾਹੀ ਪਰਿਵਾਰ ਉਨ੍ਹਾਂ ਦੇ ਬੇਟੇ ਆਰਚੀ ਨੂੰ ਪ੍ਰਿੰਸ ਨਹੀਂ ਸੀ ਬਣਾਉਣਾ ਚਾਹੁੰਦਾ, ਕਿਉਂਕਿ ਉਸ ਦੇ ਜਨਮ ਤੋਂ ਪਹਿਲਾਂ ਉਨ੍ਹਾਂ ਨੂੰ ਡਰ ਸੀ ਕਿ ਕਿਧਰੇ ਉਸ ਦਾ ਰੰਗ ਕਾਲਾ ਨਾ ਹੋਵੇ? ਇਸ ਦੌਰਾਨ ਉਨ੍ਹਾਂ ਨੇ ਕਿਹਾ ਕਿ ਕਈ ਵਿਸ਼ਿਆਂ ਬਾਰੇ ਸ਼ਾਹੀ ਪਰਿਵਾਰ ਨਾਲ ਵਿਵਾਦ ਸਨ।
ਹਾਲੀਵੁੱਡ ਸਟਾਰ ਓਪਰਾ ਵਿਨਫਰੇ ਨਾਲ ਗੱਲਬਾਤ ਵਿੱਚ ਮੇਗਨ ਮਰਕਲ ਨੇ ਕਿਹਾ ਕਿ ਬੇਟੇ ਆਰਚੀ ਦੇ ਜਨਮ ਤੋਂ ਪਹਿਲਾਂ ਸ਼ਾਹੀ ਪਰਿਵਾਰ ਨੇ ਪ੍ਰਿੰਸ ਹੈਰੀ ਨਾਲ ਇਸ ਦੀ ਚਰਚਾ ਕੀਤੀ ਸੀ, ਜੋ ਉਨ੍ਹਾਂ ਲਈ ਕਾਫੀ ਦਰਦਨਾਕ ਸੀ। ਮੇਗਨ ਨੇ ਇੰਟਰਵਿਊ ਵਿੱਚ ਉਸ ਸ਼ਖ਼ਸ ਦਾ ਨਾਂ ਨਹੀਂ ਦੱਸਿਆ, ਜਿਸ ਨੇ ਇਸ ਗੱਲ ਦਾ ਸ਼ੱਕ ਜਤਾਇਆ ਸੀ। ਵਰਨਣ ਯੋਗ ਹੈ ਕਿ ਮੇਗਨ ਮਰਕਲ ਦੀ ਮਾਂ ਦਾ ਪਿਛੋਕੜ ਗੈਰ-ਗੋਰੀ ਅਮਰੀਕਨ ਅਤੇ ਬਾਪ ਦਾ ਪਿਛੋਕੜ ਯੂਰਪੀ ਮੂਲ ਦੇ ਗੋਰੇ ਅਮਰੀਕੀ ਵਾਲਾ ਹੋਣ ਕਾਰਨ ਮਾਂ ਦੇ ਪਿਛੋਕੜ ਕਾਰਨ ਇਹ ਡਰ ਲੱਗਾ ਹੋਣ ਦੀ ਚਰਚਾ ਹੈ ਕਿ ਮੇਗਨ ਦੇ ਜੀਨ ਦੇ ਕਾਰਨ ਕਿਤੇ ਗੈਰ ਗੋਰਾ ਬੱਚਾ ਪੈਦਾ ਨਾ ਹੋ ਜਾਂਦਾ ਹੋਵੇ, ਜਿਸ ਦਾ ਖੁਲਾਸਾ ਮੇਗਨ ਨੇ ਇਸ ਵਕਤ ਕੀਤਾ ਹੈ।
ਇਹੀ ਨਹੀਂ, ਪ੍ਰਿੰਸੇਸ ਦਾ ਅਹੁਦਾ ਛੱਡ ਚੁੱਕੀ ਮੇਗਨ ਨੇ ਦੱਸਿਆ ਕਿ ਸ਼ਾਹੀ ਪਰਿਵਾਰ ਨਾਲ ਸਮਾਂ ਬਿਤਾਉਂਦੇ ਹੋਏ ਉਨ੍ਹਾਂ ਨੂੰ ਕਈ ਵਾਰੀ ਆਤਮ-ਹੱਤਿਆ ਕਰਨ ਦੇ ਵਿਚਾਰ ਆਉਂਦੇ ਸਨ। ਉਨ੍ਹਾਂ ਕਿਹਾ ਕਿ ਉਹ ਬਿਲਕੁੱਲ ਜੀਣਾ ਨਹੀਂ ਸੀ ਚਾਹੁੰਦੀ। ਮੇਗਨ ਨੇ ਕਿਹਾ ਕਿ ਪ੍ਰਿੰਸ ਹੈਰੀਨਾਲ ਵਿਆਹ ਕਰਨ ਤੋਂ ਪਹਿਲਾਂ ਸ਼ਾਹੀ ਪਰਵਾਰ ਦੀ ਵੱਡੀ ਨੂੰਹ ਪ੍ਰਿਸੇਸ ਕੇਟ ਮਿਡਲਟਨ ਨੇ ਵੀ ਉਨ੍ਹਾਂ ਨੂੰ ਕਾਫੀ ਪਰੇਸ਼ਾਨ ਕੀਤਾ ਸੀ। ਵਰਨਣ ਯੋਗ ਹੈ ਕਿ ਕੇਟ ਮਿਡਲਟਨ ਵੱਡੇ ਪ੍ਰਿੰਸ ਵਿਲੀਅਮਸ ਦੀ ਪਤਨੀ ਹੈ। ਮੇਗਨ ਦੀ ਰਾਏ ਹੈ ਕਿ ਹੈਰੀ ਤੇ ਉਨ੍ਹਾਂ ਦੇ ਵਿਆਹ ਤੋਂ ਪਹਿਲਾਂ ਕੇਟ ਕਿਸੇ ਖਾਸ ਗੱਲ ਕਾਰਨ ਨਾਰਾਜ਼ ਸੀ, ਜੋ ਵਿਆਹਵਿੱਚ ਇਸਤੇਮਾਲ ਹੋਣ ਵਾਲੀ ਸੀ। ਉਨ੍ਹਾਂ ਦੱਸਿਆ ਕਿ ਉਸ ਸਮੇਂ ਸਥਿਤੀ ਬੇਹੱਦ ਬੁਰੀ ਸੀ। ਇੰਟਰਵਿਊ ਵਿੱਚ ਪ੍ਰਿੰਸ ਹੈਰੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਆਪਣੇ ਆਪ ਉੱਤੇ ਤੇ ਆਪਣੀ ਪਤਨੀ ਉੱਤੇ ਮਾਣ ਹੈ, ਕਿਉਂਕਿ ਜਦੋਂ ਉਹ ਗਰਭਵਤੀ ਸੀ ਤਾਂ ਉਸ ਸਮੇਂ ਉਹ ਕਾਫੀ ਬੁਰੇ ਦੌਰ ਤੋਂ ਗੁਜ਼ਰਨ ਦੇ ਬਾਵਜੂਦ ਹਿੰਮਤ ਵਾਲੀ ਰਹੀ ਸੀ।

Read More International Punjabi News