ਲੁਧਿਆਣਾ, 6 ਫਰਵਰੀ – ਹੋਟਲ ਵਿੱਚਅਕਸਰ ਆਉਂਦੇ ਜਰਮਨ ਨਾਗਰਿਕ ਬਜ਼ੁਰਗ ਐਨ ਆਰ ਆਈ ਉੱਤੇ ਹੋਟਲ ਦੀ ਅਸਿਸਟੈਂਟ ਮੈਨੇਜਰ ਨੇ ਬਲਾਤਕਾਰ ਦੇ ਦੋਸ਼ ਲਾਏ ਹਨ। ਥਾਣਾ ਕੂੰਮਕਲਾ ਦੀ ਪੁਲਸ ਨੇ ਪਿੰਡ ਕਨੇਚ ਦੇ ਐਨ ਆਰ ਆਈ ਪਰਮਜੀਤ ਸਿੰਘ ਦੇ ਖ਼ਿਲਾਫ਼ ਮਾਮਲਾ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਇਸ ਬਾਰੇ ਪੀੜਤ ਔਰਤ ਨੇ ਦੱਸਿਆ ਕਿ ਉਹ ਇੱਕ ਹੋਟਲ ਵਿੱਚ ਅਸਿਸਟੈਂਟ ਮੈਨੇਜਰ ਵਜੋਂ ਨੌਕਰੀ ਕਰਦੀ ਹੈ। ਥਾਣਾ ਕੂੰਮਕਲਾਂ ਦੇ ਪਿੰਡ ਕਨੇਚ ਦਾ ਵਸਨੀਕ ਪਰਮਜੀਤ ਸਿੰਘ ਜਰਮਨ ਨਾਗਰਿਕ ਹੈ ਤੇ ਅਕਸਰ ਹੋਟਲ ਵਿੱਚ ਆਉਂਦਾ ਸੀ। ਪੀੜਤਾ ਨੇ ਦੱਸਿਆ ਕਿ ਪਰਮਜੀਤ ਸਿੰਘ ਨੇ ਕਿਸੇ ਕੰਮ ਬਹਾਨੇ ਉਸ ਨੂੰ ਆਪਣੇ ਘਰ ਬੁਲਾ ਕੇ ਬਲਾਤਕਾਰ ਕੀਤਾ ਹੈ। ਦੂਜੇ ਪਾਸੇ ਐਨ ਆਰ ਆਈ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਇਹ ਲੜਕੀ ਉਸ ਨਾਲ ਚਾਰ ਸਾਲ ਤੋਂ ਲਿਵ ਇਨ ਰਿਲੇਸ਼ਨਸ਼ਿਪ ਵਿੱਚ ਹੈ। ਜਦ ਵੀ ਉਹ ਜਰਮਨ ਤੋਂ ਆਉਂਦਾ ਤਾਂ ਕੁੜੀ ਉਸ ਕੋਲ ਆ ਜਾਂਦੀ ਸੀ। ਪਰਮਜੀਤ ਸਿੰਘ ਨੇ ਦੋਸ਼ ਲਾਇਆ ਕਿ ਕੁੜੀ ਨੇ ਕਈ ਵਾਰ ਉਸ ਦੇ ਪੈਸੇ ਚੋਰੀ ਕੀਤੇ ਸਨ ਤੇ ਪਿੱਛੇ ਜਿਹੇ ਲੜਕੀ ਨੇ ਉਸ ਦੇ 600 ਯੂਰੋ ਅਤੇ 15 ਹਜ਼ਾਰ ਰੁਪਏ ਚੋਰੀ ਕਰ ਲਏ ਸਨ। ਜਦੋਂ ਉਸ ਨੇ ਲੜਕੀ ਦੀ ਜੁੱਤੀ ਦੇ ਪਤਾਵੇ ਚੈਕ ਕੀਤੇ ਤਾਂ ਵਿੱਚੋਂ ਨਕਦੀ ਮਿਲ ਗਈ। ਇਸ ਕੇਸ ਦੇ ਜਾਂਚ ਅਫ਼ਸਰ ਕਮਲਜੀਤ ਸਿੰਘ ਨੇ ਦੱਸਿਆ ਕਿ ਪੁਲਸ ਨੇ ਲੜਕੀ ਦੇ ਬਿਆਨਾਂ ਉੱਤੇ ਐਨ ਆਰ ਆਈ ਦੇ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਅਤੇ ਐਨ ਆਰ ਆਈ ਦੀ ਸ਼ਿਕਾਇਤ ਉੱਤੇ ਲੜਕੀ ਦੇ ਖ਼ਿਲਾਫ਼ ਵੀ ਚੋਰੀ ਦਾ ਮਾਮਲਾ ਦਰਜ ਕਰ ਲਿਆ ਹੈ। ਜੋ ਵੀ ਦੋਸ਼ੀ ਪਾਇਆ ਜਾਵੇਗਾ, ਉਸ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।