ਲੰਡਨ, 22 ਮਾਰਚ – ਭਾਰਤ ਨੂੰ ਸਪੁਰਦਗੀ/ਹਵਾਲਗੀ ਦੀਆਂ ਕੋਸ਼ਿਸਾਂ ਨਾਲ ਸਬੰਧਤ ਕੁਝ ਹਾਈ-ਪ੍ਰੋਫਾਈਲ ਕੇਸਾਂ ਤੇ ਕੁਝ ਅਜਿਹੇ ਕੇਸਾਂ, ਜਿਨ੍ਹਾਂ ਬਾਰੇ ਬਹੁਤ ਘੱਟ ਲੋਕਾਂ ਨੂੰ ਪਤਾ ਹੈ ਤੇ ਭਾਰਤ ਵਿੱਚ ਕਾਨੂੰਨੀ ਦਾਅਪੇਚ ਤੋਂ ਬਚਣ ਲਈ ਯੂ ਕੇ ਨੂੰ ਕਿਉਂ ਸਭ ਤੋਂ ਸੁਰੱਖਿਅਤ ਥਾਂ ਮੰਨਿਆ ਜਾਂਦਾ ਹੈ, ਅਜਿਹੇ ਕੁਝ ਅਹਿਮ ਤੱਥਾਂ ਤੋਂ ਪਰਦਾ ਚੁੁੱਕਦੀ ਹੈ ‘ਐਸਕੇਪਡ-ਟਰੂ ਸਟੋਰੀਜ਼ ਆਫ ਇੰਡੀਅਨ ਫਿਊਜੀਟਿਵਜ਼ ਇਨ ਲੰਡਨ’ ਨਾਂਅ ਦੀ ਨਵੀਂ ਕਿਤਾਬ। ਇਸ ਕਿਤਾਬ ਵਿੱਚ 12 ਅਜਿਹੇ ਕੇਸਾਂ ਦਾ ਜ਼ਿਕਰ ਹੈ, ਜਿਨ੍ਹਾਂ ਵਿੱਚ ਬੈਂਕਾਂ ਨਾਲ ਧੋਖਾਧੜੀ ਅਤੇ ਕਤਲ ਜਿਹੇ ਅਪਰਾਧਾਂ ਲਈ ਭਾਰਤ ਵਿੱਚ ਲੋੜੀਂਦੇ ਮੁਲਜ਼ਮ ਯੂ ਕੇ ਵਿੱਚ ਜਾ ਲੁਕੇ ਹਨ।
ਲੰਡਨ ਵਿਚਲੇ ਪੱਤਰਕਾਰਾਂ ਅਤੇ ਖੋਜੀਆਂ ਦਾਨਿਸ਼ ਅਤੇ ਰੂਹੀ ਖਾਨ ਵੱਲੋਂ ਲਿਖੀ ਇਸ ਕਿਤਾਬ ਵਿੱਚ ਕਿੰਗਫਿਸ਼ਰ ਏਅਰਲਾਈਨ ਦੇ ਸਾਬਕਾ ਬੌਸ ਵਿਜੈ ਮਾਲਿਆ ਅਤੇ ਹੀਰਾ ਵਪਾਰੀ ਨੀਰਵ ਮੋਦੀ, ਜਿਹੜੇ ਧੋਖਾਧੜੀ ਤੇ ਮਨੀ ਲਾਂਡਰਿੰਗ ਦੇ ਦੋਸ਼ਾਂ ਹੇਠ ਭਾਰਤ ਵਿੱਚ ਲੋੜੀਂਦੇ ਹਨ, ਦਾ ਵੀ ਜ਼ਿਕਰ ਹੈ। ਕਿਤਾਬ ਵਿੱਚ ਭਾਰਤੀ ਨੇਵੀ ਦੇ ਸਾਬਕਾ ਅਧਿਕਾਰੀ ਰਵੀ ਸ਼ੰਕਰਨ ਅਤੇ ਸੰਗੀਤਸਾਜ਼ ਨਦੀਮ ਸੈਫ਼ੀ ਜਿਹੇ ਕੁਝ ਇਤਿਹਾਸਕ ਕੇਸਾਂ ਦਾ ਵੇਰਵਾ ਵੀ ਦਰਜ ਹੈ।ਦਾਨਿਸ਼ ਖਾਨ ਨੇ ਕਿਹਾ ਕਿ ਇਨ੍ਹਾਂ 12 ਕੇਸਾਂ ਨੰ ਦੋਸ਼ਾਂ ਦੀ ਮਹੱਤਤਾ ਉਤੇ ਸੁਣਵਾਈ ਵੇਲੇ ਹੋਈ ਦਿਲਚਸਪ ਜ਼ਿਰ੍ਹਾ ਤੇ ਫੈਸਲਿਆਂ ਦੌਰਾਨ ਕੀਤੀਆਂ ਗਈਆਂ ਟਿੱਪਣੀਆਂ ਦੇ ਆਧਾਰ ਉਤੇ ਸ਼ਾਮਲ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ, ‘ਅਸੀਂ ਸਪੁਰਦਗੀ ਜਾਂ ਹਵਾਲਗੀ ਦੇ ਨਾਲ ਸਬੰਧਤ ਕੇਸਾਂ ਦਾ ਬਹੁਤ ਵਿਸਥਾਰ ਵਿੱਚ ਅਧਿਐਨ ਕੀਤਾ ਸੀ। ਕਿਤਾਬ ਦੇ ਆਖਰੀ ਚੈਪਟਰ ਵਿੱਚ ਹਵਾਲਗੀ ਦੇ ਅਮਲ ਨਾਲ ਜੁੜੇ ਸਿਧਾਂਤਾਂ ਦੀ ਬਿਹਤਰ ਸਮਝ ਵਿਕਸਤ ਕਰਨ ਲਈ ਮਾਹਰਾਂ ਨਾਲ ਲੰਮੀਆਂ ਇੰਟਰਵਿਊਜ਼ ਕੀਤੀਆਂ ਗਈਆਂ ਅਤੇ ਕੇਸ ਨਾਲ ਜੁੜੇ ਕਾਨੂੰਨਾਂ ਤੇ ਸੰਸਦੀ ਰਿਪੋਰਟਾਂ ਦੀ ਮਦਦ ਲਈ ਗਈ ਹੈ।ਇਸ ਜੋੜੇ ਨੇ ਕਿਹਾ ਕਿ ਉਨ੍ਹਾਂ ਪੱਤਰਕਾਰ ਵਜੋਂ ਲੰਡਨ ਵਿੱਚ ਤਾਜ਼ਾ ਕੋਰਟ ਕੇਸਾਂ ਨੰ ਕਵਰ ਕਰਦਿਆਂ 1950ਵਿਆਂ ਨਾਲ ਸਬੰਧਤ ਪੁਰਾਣੇ ਕੇਸਾਂ ਦੀ ਸਮੀਖਿਆ ਲਈ ਬਰਤਾਨਵੀ ਪੁਰਾਤਨ ਹੱਥ ਲਿਖਤਾਂ ਤੇ ਖਰੜਿਆਂ ਦਾ ਵੀ ਅਧਿਐਨ ਕੀਤਾ, ਜਿਨ੍ਹਾਂ ਦਾ ਭਾਰਤ-ਯੂ ਕੇ ਹਵਾਲਗੀ ਨੀਤੀ ਉਤੇ ਵੱਡਾ ਅਸਰ ਸੀ। ਕਿਤਾਬ ਵਿੱਚ ਅੰਡਰਵਰਲਡ ਸਰਗਨੇ ਦਾਊਦ ਇਬਰਾਹੀਮ ਦੇ ਅਹਿਮ ਲਫਟੈਨ ਇਕਬਾਲ ਮਿਰਚੀ ਦੀ ਹਵਾਲਗੀ ਨਾਲ ਜੁੜੇ ਕੇਸ ਦਾ ਵੀ ਵੇਰਵਾ ਹੈ।

Read More International Punjabi News