ਪੇਈਚਿੰਗ, 11 ਫਰਵਰੀ – ਚੀਨ ‘ਚ 58 ਹਜ਼ਾਰ ਤੋਂ ਵੱਧ ਨਕਲੀ ਕੋਰੋਨਾ ਵੈਕਸੀਨ ਦੇ ਉਤਪਾਦਨ ਅਤੇ ਵੰਡ ਦੇ ਕਈ ਕੇਸਾਂ ਦਾ ਪੁਲਸ ਨੇ ਭਾਂਡਾ ਭੰਨਿਆ ਹੈ। ਚੀਨ ਦੇ ਪ੍ਰੋਸੀਕਿਊਟਰ ਜਨਰਲ ਦਫ਼ਤਰ ਵੱਲੋਂ ਕੱਲ੍ਹ ਜਾਰੀ ਬਿਆਨ ਦੇ ਮੁਤਾਬਕ ਕੋਂਗ ਨਾਂ ਨਾਲ ਜਾਣੇ ਗਏ ਸ਼ੱਕੀਆਂ ਦਾ ਇੱਕ ਗਰੁੱਪ ਨਕਲੀ ਵੈਕਸੀਨ ਦਾ ਉਤਪਾਦਨ ਕਰ ਕੇ ਇਸ ਦੀ ਸਮਗਲਿੰਗ ‘ਚ ਸ਼ਾਮਲ ਰਿਹਾ ਹੈ। ਇਸ ਗਰੁੱਪ ਨੇ ਨਕਲੀ ਵੈਕਸੀਨ ਦੀਆਂ 600 ਡੋਜਾਂ ਪਿਛਲੇ ਸਾਲ 11 ਨਵੰਬਰ ਨੂੰ ਹਾਂਗਕਾਂਗ ਭੇਜੀਆਂ ਸਨ ਅਤੇ ਦੂਸਰੇ ਦਿਨ ਇਨ੍ਹਾਂ ਨੂੰ ਅਣਪਛਾਤੇ ਸਥਾਨਾਂ ‘ਤੇ ਭੇਜ ਦਿੱਤਾ ਗਿਆ।
ਇਸੇ ਤਰ੍ਹਾਂ ਨਕਲੀ ਵੈਕਸੀਨ ਦੀਆਂ 1200 ਡੋਜਾਂ ਦੀ ਦੂਸਰੀ ਖੇਪ 12 ਨਵੰਬਰ ਨੂੰ ਹਾਂਗਕਾਂਗ ਭੇਜੀ ਗਈ ਸੀ, ਪਰ ਕੁਝ ਲੋਕਾਂ ਦੇ ਫੜੇ ਜਾਣ ਕਾਰਨ ਦੋ ਹਫ਼ਤੇ ਬਾਅਦ ਵੈਕਸੀਨ ਦੀ ਇਸ ਖੇਪ ਨੂੰ ਨਸ਼ਟ ਕਰ ਦਿੱਤਾ ਗਿਆ। ਬਿਆਨ ਮੁਤਾਬਕ ਚੀਨ ਦੀ ਪੁਲਸ ਨੇ ਨਕਲੀ ਵੈਕਸੀਨ ਨਾਲ ਸਬੰਧਤ 21 ਮਾਮਲਿਆਂ ‘ਚ ਹੁਣ ਤੱਕ ਲੱਗਭਗ 70 ਸ਼ੱਕੀਆਂ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ, ਜਿਸ ਬਾਰੇ ਅਗਲੀ ਕਾਰਵਾਈ ਚੱਲ ਰਹੀ ਹੈ।

Latest Science and Health News