ਮੋਗਾ, 18 ਫਰਵਰੀ – ਵਿਆਹ ਕਰ ਕੇ ਵਿਦੇਸ਼ ਜਾਣ ਦੀ ਖਾਹਿਸ਼ ਵਿੱਚ ਨੌਜਵਾਨ ਨੇ ਆਈਲੈਟਸ ਪਾਸ ਕਰ ਚੁੱਕੀ ਇੱਕ ਲੜਕੀ ਨਾਲ ਵਿਆਹ ਕੀਤਾ। ਮੰਗਣੀ ਤੋਂ ਵਿਆਹ ਅਤੇ ਵਿਦੇਸ਼ ਜਾਣ ਦੀ ਫੀਸ ਭਰਨ ਤੱਕ 32 ਲੱਖ ਖਰਚ ਕੀਤੇ। ਆਪਣੇ ਨਾਲ ਹੋਈ ਠੱਗੀ ਦੇ ਦੋਸ਼ਵਿੱਚ ਨੌਜਵਾਨ ਦੀ ਮਾਤਾ ਦੀ ਸ਼ਿਕਾਇਤ ਉਤੇ ਪੁਲਸ ਨੇ ਉਨ੍ਹਾਂ ਦੀ ਨੂੰਹ, ਉਸ ਦੇ ਮਾਤਾ, ਪਿਤਾ, ਮਾਮੇ ਅਤੇ ਪ੍ਰੇਮੀ ਦੇ ਖਿਲਾਫ ਕੇਸ ਦਰਜ ਕੀਤਾ ਹੈ।
ਥਾਣਾ ਨਿਹਾਲ ਸਿੰਘ ਵਾਲਾ ਦੇ ਏ ਐਸ ਆਈ ਕੁਲਦੀਪ ਰਾਜ ਨੇ ਦੱਸਿਆ ਕਿ ਪਿੰਡ ਨੰਗਲ ਦੀ ਮਨਜੀਤ ਕੌਰ ਨੇ 14 ਅਕਤੂਬਰ 2020 ਨੂੰ ਐਸ ਐਸ ਪੀ ਮੋਗਾ ਨੂੰ ਦਿੱਤੀ ਲਿਖਤੀ ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਕਿ ਉਹ ਆਪਣੇ ਬੇਟੇ ਹਰਪ੍ਰੀਤ ਸਿੰਘ ਨੂੰ ਕੈਨੇਡਾ ਭੇਜਣਾ ਚਾਹੰੁਦੀ ਸੀ। ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਜ਼ਿਲ੍ਹਾ ਲੁਧਿਆਣਾ ਦੇ ਪਿੰਡ ਚੱਕਰ ਦੀ ਪ੍ਰਦੀਪ ਕੌਰ ਬਾਰ੍ਹਵੀਂ ਪਾਸ ਹੈ ਅਤੇ ਆਈਲੈਟਸ ਕਰਨ ਦੇ ਬਾਅਦ ਸਟੱਡੀ ਬੇਸ ‘ਤੇ ਕੈਨੇਡਾ ਗਈ ਸੀ। ਉਸ ਦੇ ਪਰਵਾਰ ਦੇ ਨਾਲ ਰਿਸ਼ਤੇ ਦੀ ਗੱਲ ਚਲਾਈ ਤਾਂ ਉਨ੍ਹਾਂ ਨੇ ਕਿਹਾ ਕਿ ਮੰਗਣੀ ਤੋਂ ਲੈ ਕੇ ਵਿਆਹ, ਫੀਸ ਭਰਨ ਤੱਕ ਦਾ ਸਾਰਾ ਖਰਚਾ ਲੜਕੇ ਦੇ ਪਰਵਾਰ ਵੱਲੋਂ ਚੁੱਕਣ ‘ਤੇ ਵਿਆਹ ਹੋਵੇਗਾ। ਬਦਲੇ ਵਿੱਚ ਪ੍ਰਦੀਪ ਕੌਰ ਉਸ ਦੇ ਬੇਟੇ ਨੂੰ ਕੈਨੇਡਾ ਲੈ ਜਾਏਗੀ। ਇਹ ਸਭ ਗੱਲਾਂ ਤੈਅ ਹੋਣ ‘ਤੇ 23 ਦਸੰਬਰ 2018 ਨੂੰ ਉਸ ਦੇ ਬੇਟੇ ਹਰਪ੍ਰੀਤ ਸਿੰਘ ਦਾ ਵਿਆਹ ਪ੍ਰਦੀਪ ਕੌਰ ਨਾਲ ਹੋਇਆ ਸੀ, ਜਿਸ ਦੇ ਇੱਕ ਹਫਤੇ ਤੱਕ ਪ੍ਰਦੀਪ ਕੌਰ ਸਹੁਰੇ ਰਹੀ ਅਤੇ 30 ਦਸੰਬਰ 2018 ਨੂੰ ਵਾਪਸ ਕੈਨੇਡਾ ਚਲੀ ਗਈ। ਉਸ ਦੀ ਨੂੰਹ ਦੇ ਵਿਦੇਸ਼ ਜਾਣ ਪਿੱਛੋਂ ਕਾਲਜ ਫੀਸ ਜਮ੍ਹਾਂ ਹੋ ਗਈ ਤਾਂ ਪਤਾ ਲੱਗਾ ਕਿ ਉਹ ਅਨਮੋਲ ਸ਼ਰਮਾ ਨਾਲ ਰਹਿੰਦੀ ਤੇ ਉਸ ਦੇ ਰਾਹੀਂ ਧਮਕੀਆਂ ਦੇਣ ਲੱਗ ਪਈ ਕਿ ਜੇ ਉਸ ਨੇ ਤੰਗ ਕੀਤਾ ਤਾਂ ਉਨ੍ਹਾਂ ਉੱਤੇ ਕੇਸ ਦਰਜ ਕਰਵਾ ਦਿੱਤਾ ਜਾਵੇਗਾ।