ਮੰਚ ਅਤੇ ਪੰਚ ਨਹੀਂ ਬਦਲੇ ਜਾਣਗੇ: ਟਿਕੈਤ

ਕਰਨਾਲ, 14 ਫਰਵਰੀ, – ਭਾਰਤ ਸਰਕਾਰ ਦੇ ਤਿੰਨ ਨਵੇਂ ਖੇਤੀਬਾੜੀ ਕਾਨੂੰਨਾਂ ਵਿਰੁੱਧ ਅੰਦੋਲਨ ਅੱਗੇ ਵਧ ਰਿਹਾ ਹੈ ਅਤੇ ਸਰਕਾਰ ਅਤੇ ਕਿਸਾਨਾਂ ਵਿਚਾਲੇ ਗੱਲਬਾਤ ਬੰਦ ਹੈ। ਇਸ ਦੌਰਾਨ ਕਿਸਾਨਾਂ ਨੇ ਆਵਾਜ਼ ਬੁਲੰਦ ਕਰਨ ਅਤੇ ਸਰਕਾਰ ਉੱਤੇ ਦਬਾਅ ਬਣਾਉਣ ਲਈ ਵੱਖ-ਵੱਖ ਥਾਵਾਂ ਉੱਤੇ ਮਹਾ ਪੰਚਾਇਤਾਂ ਦਾ ਸਿਲਸਿਲਾ ਤੇਜ਼ ਕਰ ਦਿੱਤਾ ਹੈ। ਅੱਜ ਐਤਵਾਰ ਨੂੰ ਕਰਨਾਲ ਦੇ ਇੰਦਰੀ ਵਿਖੇ ਕਿਸਾਨਾਂ ਦੀ ਮਹਾਂ ਪੰਚਾਇਤ ਹੋਈ, ਜਿੱਥੇ ਕਿਸਾਨ ਆਗੂ ਰਾਕੇਸ਼ ਟਿਕੈਤ, ਗੁਰਨਾਮ ਸਿੰਘ ਚੜੁੰਨੀ ਤੇ ਬਲਬੀਰ ਸਿੰਘ ਰਾਜੇਵਾਲ ਸਣੇ ਕਈ ਆਗੂ ਪਹੁੰਚੇ।ਇਨ੍ਹਾ ਕਿਸਾਨ ਆਗੂਆਂ ਨੂੰ ਸੁਣਨ ਲਈ ਅੱਜ ਦੀ ਮਹਾ ਪੰਚਾਇਤ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕਾਂ ਦੀ ਭੀੜ ਸੀ।
ਰਾਕੇਸ਼ ਟਿਕੈਤ ਨੇ ਅੱਜ ਦੀ ਮਹਾਪੰਚਾਇਤ ਦੇ ਮੰਚ ਤੋਂ ਕਿਹਾ ਕਿ ਹਰਿਆਣਾ ਦੇ ਲੋਕ ਬੜੇ ਲੜਾਕੂ ਹਨ, ਅੰਦੋਲਨ ਖ਼ਤਮ ਹੋ ਰਿਹਾ ਸੀ ਤਾਂ ਹਰਿਆਣਾ ਦੇ ਲੋਕਾਂ ਨੇ ਬਚਾਇਆ ਹੈ। ਇਸ ਮੌਕੇ ਟਿਕੈਤ ਨੇ ਮੰਚ ਤੋਂ ਅੱਗੇ ਤੋਂ ਨਵਾਂ ਨਾਅਰਾ ਦੇ ਦਿੱਤਾ ਕਿ ‘ਲੜੇਗਾ ਜਵਾਨ, ਜਿੱਤੇਗਾ ਕਿਸਾਨ’। ਇਸ ਦੇ ਨਾਲ ਰਾਕੇਸ਼ ਟਿਕੈਤ ਨੇ ਇਹ ਵੀ ਕਿਹਾ ਕਿ ਕਿਸੇ ਵੀ ਰਾਜ ਦੇ ਕਿਸਾਨਾਂ ਨੂੰ ਸਾਡੀ ਕਦੇ ਜ਼ਰੂਰਤ ਪਈ ਤਾਂ ਅਸੀਂ ਉਥੇ ਜਾਵਾਂਗੇ। ਉਨ੍ਹਾਂ ਸਾਫ ਕਿਹਾ ਕਿ ਸਰਕਾਰ ਕੁਝ ਵੀ ਕਹਿੰਦੀ ਰਹੇ, ਨਾ ਸਾਡਾ ਮੰਚ ਬਦਲੇਗਾ, ਨਾ ਲੀਡਰ ਬਦਲਣਗੇ, ਮੰਚ ਅਤੇ ਪੰਚ ਉਹੀ ਰਹਿਣਗੇ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਖੇਤੀਬਾੜੀ ਕਾਨੂੰਨਾਂ ਬਾਰੇ ਕਿਸਾਨ ਫੈਸਲਾ ਲੈਣਗੇ, ਚਮਕਦਾਰ ਕੋਠੀਆਂ ਵਿੱਚ ਬੈਠੇ ਨੇਤਾ ਨਹੀਂ ਲੈ ਸਕਦੇ।