ਜਮਨਾਨਗਰ, 2 ਫਰਵਰੀ – ਹਿਸਾਰ ਦੇ ਬਰਵਾਲਾ ਦੇ ਸਾਬਕਾ ਵਿਧਾਇਕ ਰੇਲੂਰਾਮ ਪੂਨੀਆ ਸਮੇਤ ਪਰਵਾਰ ਦੇ ਅੱਠ ਜੀਆਂ ਦੇ ਕਾਤਲ ਸੰਜੀਵ ਨੂੰ ਐਸ ਟੀ ਐਫ ਟੀਮ ਨੇ ਮੇਰਠ ਤੋਂ ਗ੍ਰਿਫਤਾਰ ਕੀਤਾ ਹੈ। ਉਥੇ ਉਹ ਬਾਬੇ ਦੇ ਭੇਸ ਵਿੱਚ ਰਹਿ ਰਿਹਾ ਸੀ। ਪੁਲਸ ਨੇ ਉਸ `ਤੇ ਇੱਕ ਲੱਖ ਰੁਪਏ ਦਾ ਇਨਾਮ ਐਲਾਨ ਕੀਤਾ ਹੋਇਆ ਸੀ।
ਪੁਲਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਸੰਜੀਵ ਮੇਰਠ ਵਿੱਚ ਨੈਸ਼ਨਲ ਹਾਈਵੇ ਕੰਢੇ ਯੂ ਪੀ ਕਲੱਬ ਦੇ ਨੇੜੇ ਰਹਿ ਰਿਹਾ ਹੈ। ਪੁੱਛਗਿੱਛ ਵਿੱਚ ਦੱਸਿਆ ਗਿਆ ਕਿ ਉਹ ਫਰਾਰ ਹੋਣ ਪਿੱਛੋਂ ਧਾਰਮਿਕ ਸਥਾਨਾਂ ਦੇ ਨੇੜੇ ਰਹਿੰਦਾ ਸੀ। ਸੰਜੀਵ ਨੂੰ ਫੜਨ ਲਈ ਐਸ ਟੀ ਐਫ (ਸਪੈਸ਼ਲ ਟਾਸਕ ਫੋਰਸ) ਕਾਫੀ ਦਿਨਾਂ ਤੋਂ ਲੱਗੀ ਸੀ। ਪੁਲਸ ਅਨੁਸਾਰ ਰੇਲੂ ਰਾਮ ਪੂਨੀਆ ਸਣੇ ਪਰਵਾਰ ਦੇ ਅੱਠ ਜੀਆਂ ਦਾਕਤਲ 24 ਅਗਸਤ 2001 ਨੂੰ ਉਨ੍ਹਾਂ ਦੇ ਜਵਾਈ ਸੰਜੀਵ ਅਤੇ ਬੇਟੀ ਸੋਨੀਆ ਨੇ ਕੀਤਾ ਸੀ। 2004 ਵਿੱਚ ਕੋਰਟ ਨੇ ਦੋਵਾਂ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਸੀ, ਜਿਸ ਨੂੰ ਬਾਅਦ ਵਿੱਚ ਕੋਰਟ ਨੇ ਉਮਰ ਕੈਦ ਵਿੱਚ ਬਦਲ ਦਿੱਤਾ ਸੀ।ਕੁਰੂਕਸ਼ੇਤਰ ਜੇਲ੍ਹ ਦੇ ਡਿਪਟੀ ਸੁਪਰਡੈਂਟ ਨੇ ਸ਼ਿਕਾਇਤ ਦਿੱਤੀ ਸੀ ਕਿ ਦੋਸ਼ੀ ਜੋੜਾ ਸੰਜੀਵ ਤੇ ਸੋਨੀਆ ਜੇਲ੍ਹ ਵਿੱਚ ਹਨ। ਉਨ੍ਹਾਂ ਨੇ ਮਕਾਨ ਦੀ ਮੁਰੰਮਤ ਦੀ ਗੱਲ ਕਹਿ ਕੇ ਪੈਰੋਲ ਦੀ ਅਰਜ਼ੀ ਦਿੱਤੀ ਸੀ। ਮਈ 2018 ਵਿੱਚ ਸੰਜੀਵ ਦੀ ਪੈਰੋਲ ਮਨਜ਼ੂਰ ਹੋਈ ਤੇ ਉਹ 28 ਦਿਨ ਦੇ ਲਈ ਘਰ ਆਇਆ ਸੀ। ਜੋੜੇ ਨੇ 31 ਮਈ 2018 ਨੂੰ ਜੇਲ੍ਹ ਵਿੱਚ ਵਾਪਸ ਆਉਣਾ ਸੀ, ਪਰ ਨਹੀਂ ਆਇਆ।