ਚੰਡੀਗੜ੍ਹ, 1 ਦਸੰਬਰ – ਕਿਸਾਨ ਧਰਨੇ ਵਿੱਚ ਦਿੱਲੀ ਗਈ ਬਿਰਧ ਮਾਈ ਮਹਿੰਦਰ ਨੇ ਆਢਾ ਲਿਆ ਹੈ। ਉਸ ਨੂੰ ਜ਼ਿੰਦਗੀ ਨਹੀਂ ਹਰਾ ਸਕੀ, ਜੋਸ਼ ਤੇ ਜਜ਼ਬੇ ਅੱਗੇ ਸਭ ਢੇਰੀ ਹੋ ਗਏ। ਅਦਾਕਾਰਾ ਕੰਗਣਾ ਰਣੌਤ ਨੇ ਉਸ ਦੇ ਵੱਲ ਉਂਗਲ ਉਠਾਈ ਹੈ, ਜਿਸ ਨੇ ਇਸ ਬਿਰਧ ਦੀ ਆਤਮਾ ਨੂੰ ਝਟਕਾ ਦਿੱਤਾ ਹੈ। ਕੰਗਣਾ ਰਣੌਤ ਨੇ ਟਵੀਟ ਕਰ ਕੇ ਇਸ ਮਾਈ ਨੂੰ ਕਿਸਾਨ ਅੰਦੋਲਨ ਵਿੱਚ 100 ਰੁਪਿਆ ਭਾੜਾ ਲੈ ਕੇ ਕੁੱਦਣ ਵਾਲੀ ਔਰਤ ਦੱਸਿਆ ਸੀ।
ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਬਹਾਦਰਗੜ੍ਹ ਜੰਡੀਆਂ ਦੀ ਮਹਿੰਦਰ ਕੌਰ ਨੇ ਖੁਦ ਵਾਢੀ ਦੇ ਮੌਕੇ ਦਾਤੀ ਚਲਾਈ, ਰਾਤਾਂ ਨੂੰ ਖੁਦ ਫਸਲਾਂ ਨੂੰ ਪਾਣੀ ਲਾਏ, ਟਿੱਬੇ ਪੱਧਰੇ ਕੀਤੇ। ਖੇਤਾਂ ਤੋਂ ਸੁੱਖ ਚੈਨ ਨਿਛਾਵਰ ਕੀਤਾ ਤੇ ਬਾਬੇ ਨਾਨਕ ਦਾ ਸੱਚਾ ਕਿਰਤੀ ਬਣੀ। ਖੇਤਾਂ ਦੀ ਕਿਰਤ ਨੇ ਨੇ ਇਸ ਬਿਰਧ ਔਰਤ ਦੇ ਕੁੱਬ ਪਾ ਦਿੱਤਾ। ਅੱਗੀ ਵਰ੍ਹਿਆਂ ਦੀ ਇਹ ਬਿਰਧ ਔਰਤ ਅੱਜ ਵੀ ਸਬਜ਼ੀਆਂ ਦੀ ਕਾਸ਼ਤ ਕਰਦੀ ਹੈ। ਮਹਿੰਦਰ ਕੌਰ ਆਪਣੇ ਪੁੱਤਰ-ਪੋਤਿਆਂ ਲਈ ਜ਼ਿੰਦਗੀ’ਕਿਸਾਨ ਅੰਦੋਲਨ’ ਦੇ ਲੇਖੇ ਲਾਉਣ ਲਈ ਕਾਹਲੀ ਹੈ। ਉਹ ਹਰ ਕਿਸਾਨ ਅੰਦੋਲਨ ਵਿੱਚ ਅੱਗੇ ਹੋ ਜਾਂਦੀ ਹੈ।
ਵਰਨਣ ਯੋਗ ਕਿ ਗੌਤਮ ਯਾਦਵ ਨੇ ਦਿੱਲੀ ਵਿੱਚ ਜੁੜੇ ਕਿਸਾਨ ਅੰਦੋਲਨ ਦੇ ਬਾਰੇ ਇੱਕ ਟਵੀਟ ਕੀਤਾ ਸੀ, ਜਿਸ ਵਿੱਚ ਦੋ ਤਸਵੀਰਾਂ ਸਨ। ਇੱਕ ਬੰਨ੍ਹੇ ਸ਼ਾਹੀਨ ਬਾਗ ਵਿੱਚ ਕੁੱਦਣ ਵਾਲੀ 82 ਸਾਲਾ ਬਿਲਕੀਸ ਬਾਨੋ ਸੀ, ਜਿਸ ਨੂੰ ਟਾਈਮ ਮੈਗਜ਼ੀਨ ਨੇ ਪ੍ਰਮੁੱਖਤਾ ਦਿੱਤੀ। ਦੂਸਰੇ ਬੰਨੇ ਕਿਸਾਨੀ ਝੰਡਾ ਚੁੱਕੀ ਜਾ ਰਹੀ ਬਿਰਧ ਮਹਿੰਦਰ ਕੌਰ ਦੀ ਤਸਵੀਰ ਹੈ। ਦੋਵਾਂ ਨੂੰ ਇੱਕ ਔਰਤ ਦੱਸਿਆ ਗਿਆ ਹੈ। ਕੰਗਣਾ ਰਣੌਤ ਨੇ ਇਸ ਟਵੀਟ ‘ਤੇ ਟਿੱਪਣੀ ਕਰਦਿਆਂ ਮਹਿੰਦਰ ਕੌਰ ਨੂੰ ਸੌ ਰੁਪਏ ਭਾੜਾ ਲੈ ਕੇ ਕਿਸਾਨ ਅੰਦੋਲਨ ‘ਚ ਬੈਠਣ ਵਾਲੀ ਔਰਤ ਗਰਦਾਨ ਦਿੱਤਾ।ਬਠਿੰਡਾ ਜ਼ਿਲ੍ਹੇ ਦੀ ਬਿਰਧ ਮਹਿੰਦਰ ਕੌਰ ਦਾ ਪਰਵਾਰ ਇਹ ਮਾਨਸਿਕ ਝਟਕਾ ਨਹੀਂ ਚੱਲ ਸਕਿਆ। ਮਹਿੰਦਰ ਕੌਰ ਨੇ ਇੱਕੋ ਗੱਲ ਆਖੀ, ‘ਉਹ ਪੂਰੀ ਜ਼ਿੰਦਗੀ ਮਿੱਟੀ ਨਾਲ ਮਿੱਟੀ ਹੋਈ ਰਹੀ ਹੈ, ਦੁੱਖਾਂ ਨੇ ਪੈਰ-ਪੈਰ ਉੱਤੇ ਰਾਹ ਘੇਰੇ, ਉਂਗਲ ਚੁੱਕਣ ਵਾਲੀ ਬੀਬਾ ਉਤੇ ਕਦੇ ਸਾਡੇ ਵਾਂਗੂ ਦੁੱਖ ਪਵੇ ਤਾਂ ਉਸ ਨੂੰ ਪਤਾ ਲੱਗੇ।’ ਮਹਿੰਦਰ ਕੌਰ ਆਖਦੀ ਹੈ ਕਿ ਉਸ ਨੇ ਕਿਰਤ ਦਾ ਲੜ ਫੜਿਆ ਤੇ ਕਦੇ ਪਰਵਾਰ ਦਾ ਸਿਰ ਨੀਵਾਂ ਨਹੀਂ ਹੋਣ ਦਿੱਤਾ। ਉਸ ਉੱਤੇ ਲਾਏ ਭਾੜੇ ਵਾਲੇ ਦਾਗ ਨੇ ਸਭ ਮਿੱਟੀ ‘ਚ ਮਿਲਾ ਦਿੱਤਾ। ਮਹਿੰਦਰ ਕੌਰ ਦੇ ਬਜ਼ੁਰਗ ਪਤੀ ਲਾਭ ਸਿੰਘ ਨੰਬਰਦਾਰ ਨੇ ਕਿਹਾ ਕਿ ਝੂਠੇ ਦੋਸ਼ ਲਾਉਣ ਵਾਲੀ ਕੰਗਣਾ ਨੂੰ ਜਨਤਕ ਮੁਆਫੀ ਮੰਗਣੀ ਚਾਹੀਦੀ ਹੈ।
ਮਿਲੇ ਵੇਰਵੇ ਅਨੁਸਾਰ 1971 ਵਿੱਚ ਮਹਿੰਦਰ ਕੌਰ ਵਿਆਹ ਕਰਕੇ ਜਦੋਂ ਲਾਭ ਸਿੰਘ ਦੇ ਘਰ ਆਈ ਤਾਂ ਅੰਤਾਂ ਦੀ ਗੁਰਬਤ ਸੀ। ਕੱਚੀਆਂ ਕੰਧਾਂ ਵਾਲਾ ਘਰ ਅਤੇ ਘਰ ਵਿੱਚ ਇੱਕ ਲੱਕੜ ਵੀ ਨਹੀਂ ਸੀ। ਤਨ ਦੇ ਕੱਪੜਿਆਂ ਤੋਂ ਬਿਨਾਂ ਕੁਝ ਨਹੀਂ ਸੀ। ਅੱਜ ਵੀ ਪਰਵਾਰ ਸਿਰ ਸੱਤ ਲੱਖ ਰੁਪਏ ਦਾ ਕਰਜ਼ਾ ਹੈ। ਬਿਰਧ ਮਾਈ ਆਖਦੀ ਹੈ ਕਿ ਉਸ ਨੇ ਗਰਮੀ ਸਰਦੀ ਪਿੰਡੇ ਝੱਲੀ ਅਤੇ ਪਤੀ ਨਾਲ ਖੇਤਾਂ ‘ਚ ਦਿਨ ਰਾਤ ਕੰਮ ਕੀਤਾ। ਕਦੇ ਪਿੱਛੇ ਨਹੀਂ ਹਟੀ। ਪਤੀ ਲਾਭ ਸਿੰਘ ਕਹਿੰਦਾ ਹੈ ਕਿ ਜਦੋਂ ਖੇਤਾਂ ਨੇ ਹਰਾ ਦਿੱਤਾ, ਉਸ ਨੇ ਨਸ਼ਾ ਤਸਕਰੀ ਦੇ ਰਾਹ ਪੈਣ ਦਾ ਫੈਸਲਾ ਕੀਤਾ। ਮਹਿੰਦਰ ਕੌਰ ਨੇ ਪਤੀ ਦਾ ਰਾਹ ਰੋਕ ਲਿਆ। ਤਸਕਰੀ ਦੀ ਥਾਂ ਖੇਤਾਂ ਵਿੱਚ ਸਬਜ਼ੀਆਂ ਦੀ ਕਾਸ਼ਤ ਕਰਨ ਦਾ ਰਾਹ ਦਿਖਾਇਆ। ਦਿਨ ਰਾਤ ਦੋਵੇਂ ਜੀਅ ਸਬਜ਼ੀਆਂ ਦੀ ਪੈਦਾਵਾਰ ਕਰਨ ਲੱਗੇ। ਖੁਦ ਸ਼ਹਿਰਾਂ ਵਿੱਚ ਜਾ ਕੇ ਸਬਜ਼ੀ ਵੇਚਦੇ ਰਹੇ। ਮਹਿੰਦਰ ਕੌਰ ਨੇ ਬੱਚਿਆਂ ਦਾ ਪਾਲਣ ਪੋਸ਼ਣ ਕੀਤਾ ਅਤੇ ਨਾਲ ਪੈਲੀ ਨੂੰ ਪਾਲਿਆ। ਮਹਿੰਦਰ ਕੌਰ ਦੇ ਲੜਕੇ ਗੁਰਦਾਸ ਨੇ ਕਿਹਾ ਕਿ ਮਾਂ ਮਹਿੰਦਰ ਕੌਰ ਦੀ ਹਿੰਮਤ ਨੇ ਪਰਵਾਰ ਨੂੰ ਡੋਲਣ ਨਹੀਂ ਦਿੱਤਾ, ਪਰ ਕੰਗਣਾ ਰਣੌਤ ਨੇ ਉਂਗਲ ਚੁੱਕ ਕੇ ਬਿਨਾਂ ਕਸੂਰੋਂ ਦਾਗ ਲਾ ਦਿੱਤਾ ਹੈ। ਉਸ ਨੇ ਕਿਹਾ ਕਿ ਕੰਗਣਾ ਨੂੰ ਮੁਆਫੀ ਮੰਗਣੀ ਚਾਹੀਦੀ ਹੈ। ਮਾਂ ਮਹਿੰਦਰ ਕੌਰ ਨੇ ਕਿਹਾ ਕਿ ਉਹ ਆਖਰੀ ਦਮ ਤੱਕ ਖੇਤਾਂ ਦੇ ਪੁੱਤਾਂ ਲਈ ਲੜੇਗੀ। ਕੰਗਣਾ ਰਣੌਤ ਨੇ ਲਾਹਨਤਾਂ ਪੈਣ ਪਿੱਛੋਂ ਆਪਣਾ ਟਵੀਟ ਡਿਲੀਟ ਕਰ ਦਿੱਤਾ ਹੈ।