ਮੁੰਬਈ, 26 ਜਨਵਰੀ – ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ ਦੇ ਮੁਖੀ ਸ਼ਰਦ ਪਵਾਰ ਨੇ ਇਥੇ ਕਿਹਾ ਕਿ ਮਹਾਰਾਸ਼ਟਰ ਦੇ ਗਵਰਨਰ ਦੇ ਕੋਲ ਬਾਲੀਵੁੱਡ ਅਭਿਨੇਤਰੀ ਕੰਗਨਾ ਰਣੌਤ ਨੂੰ ਮਿਲਣ ਦਾ ਸਮਾਂ ਹੈ, ਪਰ ਉਨ੍ਹਾਂ ਹਜ਼ਾਰਾਂ ਕਿਸਾਨ ਭਰਾਵਾਂ ਨਾਲ ਮੁਲਾਕਾਤ ਦਾ ਸਮਾਂ ਨਹੀਂ, ਜੋ ਵੱਡੀ ਗਿਣਤੀ ਵਿੱਚ ਮੁੰਬਈ ਵਿੱਚ ਇਕੱਠੇ ਹੋਏ ਹਨ।
ਮਹਾਰਾਸ਼ਟਰ ਦੇ ਗਵਰਨਰ ਭਗਤ ਸਿੰਘ ਕੋਸ਼ਿਆਰੀ ਦਾ ਨਾਂਅ ਲਏ ਬਿਨਾਂ ਸ਼ਰਦ ਪਵਾਰ ਨੇ ਕਿਹਾ ਕਿ ਕਿਸਾਨ ਅੱਜ ਆਜ਼ਾਦ ਮੈਦਾਨ ਦੀ ਰੈਲੀ ਦੇ ਬਾਅਦ ਗਵਰਨਰ ਨੂੰ ਨੋਟਿਸ ਦੇਣ ਲਈ ਰਾਜ ਭਵਨ ਜਾਣ ਦੀ ਯੋਜਨਾ ਬਣਾ ਰਹੇ ਹਨ। ਪਵਾਰ ਨੇ ਆਜ਼ਾਦ ਮੈਦਾਨ `ਤੇ ਕਿਸਾਨ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਮੈਨੂੰ ਦੱਸਿਆ ਗਿਆ ਹੈ ਕਿ ਗਵਰਨਰ ਗੋਆ ਚਲੇ ਗਏ ਹਨ। ਸੂਬੇ ਦੇ ਪੂਰੇ ਇਤਹਿਾਸ ਵਿੱਚ ਅਜਿਹਾ ਗਵਰਨਰ ਕਦੇ ਨਹੀਂ ਰਿਹਾ। ਉਨ੍ਹਾਂ ਕੋਲ ਕੰਗਨਾ ਨੂੰ ਮਿਲਣ ਦਾ ਸਮਾਂ ਹੈ, ਪਰ ਸਾਡੇ ਕਿਸਾਨ ਭਰਾਵਾਂ, ਜੋ ਪੂਰੇ ਸੂਬੇ ਤੋਂ ਇੱਥੇ ਆਏ ਹਨ, ਨੂੰ ਮਿਲਣ ਦਾ ਸਮਾਂ ਨਹੀਂ ਹੈ। ਸ਼ਰਦ ਪਵਾਰ ਨੇ ਕਿਹਾ ਕਿ ਇਹ ਗਵਰਨਰ ਦਾ ਨੈਤਿਕ ਫਰਜ਼ ਹੈ ਕਿ ਉਹ ਘੱਟੋ-ਘੱਟ ਇਥੇ ਰਹਿਣ ਅਤੇ ਸੂਬੇ ਦੇ ਲੋਕਾਂ ਨੂੰ ਮਿਲਣ, ਜੋ ਅੰਨਦਾਤਾ ਹੈ। ਪਵਾਰ ਦੀ ਟਿੱਪਣੀ ਓਦੋਂ ਆਈ ਹੈ, ਜਦ ਸੰਯੁਕਤ ਸ਼ੇਤਕਾਰੀ ਕਾਮਗਾਰ ਮੋਰਚੇ ਦੇ ਨੇਤਾ ਗਵਰਨਰ ਨੂੰ ਨੋਟਿਸ ਦੇਣ ਵਾਲੇ ਹਨ ਅਤੇ ਪਵਾਰ ਨੂੰ ਸੂਚਿਤ ਕੀਤਾ ਗਿਆ ਹੈ ਕਿ ਗਵਰਨਰ ਗੋਆ ਚਲੇ ਗਏ ਹਨ।

Read More Punjabi Political News Today