ਸਮਾਣਾ, 9 ਫਰਵਰੀ – ਪ੍ਰੇਮੀ ਵੱਲੋਂ ਵਿਆਹ ਕਰਨ ਤੋਂ ਇਨਕਾਰ ਕਰਨ ਉੱਤੇ ਲੜਕੀ ਨੇ ਜ਼ਹਿਰੀਲੀ ਚੀਜ਼ ਨਿਗਲ ਕੇ ਖੁਦਕੁਸ਼ੀ ਕਰ ਲਈ। ਪੁਲਸ ਨੇ ਲੜਕੀ ਦੇ ਪ੍ਰੇਮੀ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
ਥਾਣਾ ਸਦਰ ਥਾਣਾ ਜਾਂਚ ਅਧਿਕਾਰੀ ਏ ਐਸ ਆਈ ਨਿਸ਼ਾਨ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਲੜਕੀ ਦੀ ਛੋਟੀ ਭੈਣ ਨੇ ਦੱਸਿਆ ਹੈ ਕਿ ਉਹ ਡੇਰਾ ਬੱਸੀ ਦੇ ਇੱਕ ਕਾਲਜ ਵਿੱਚ ਟੂਰਿਜ਼ਮ ਦਾ ਕੋਰਸ ਕਰਦੀ ਹੈ। ਛੇ ਫਰਵਰੀ ਨੂੰ ਉਸ ਦੀ ਭੈਣ ਆਪਣੇ ਪ੍ਰੇਮੀ ਮੱਖਣ ਸਿੰਘ ਨੂੰ ਮਿਲਣ ਆਈ ਸੀ। ਇਸ ਤੋਂ ਬਾਅਦ ਉਹ ਤਿੰਨੇ ਆਪਣੇ ਘਰ ਲਈ ਚੱਲ ਪਏ। ਦੁਪਹਿਰ ਬਾਅਦ ਬੱਸ ਰਾਹੀਂ ਪਟਿਆਲੇ ਤੋਂ ਬੁਢਲਾਡੇ ਜਾਂਦੇ ਸਮੇਂ ਸਮਾਣਾ ਟੋਲ ਬੈਰੀਅਰ ਨੇੜੇ ਉਸ ਦੀ ਭੈਣ ਅਤੇ ਮੱਖਣ ਸਿੰਘ ਵਿਚਾਲੇ ਵਿਆਹ ਕਰਵਾਉਣ ਬਾਰੇ ਤਕਰਾਰ ਵਧ ਗਿਆ ਸੀ, ਜਿਸ ਤੋਂ ਪ੍ਰੇਸ਼ਾਨ ਹੋ ਕੇ ਉਸ ਦੀ ਭੈਣ ਨੇ ਕੋਈ ਜ਼ਹਿਰੀਲੀ ਚੀਜ਼ ਖਾ ਲਈ। ਬੱਸ ਕੰਡਕਟਰ ਨੇ ਉਸ ਨੂੰ ਬੱਸ ਤੋਂ ਉਤਾਰ ਕੇ ਟੋਲ ਬੈਰੀਅਰ ਦੀ ਐਂਬੂਲੈਂਸ ਵਿੱਚ ਸਿਵਲ ਹਸਪਤਾਲ ਸਮਾਣੇ ਭੇਜ ਦਿੱਤਾ, ਉਸ ਦੀ ਹਾਲਤ ਗੰਭੀਰ ਹੋਣ ਕਾਰਨ ਡਾਕਟਰਾਂ ਨੇ ਪਟਿਆਲੇ ਰੈਫਰ ਕਰ ਦਿੱਤਾ, ਪਰ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਪੁਲਸ ਨੇ ਮ੍ਰਿਤਕਾ ਦੀ ਭੈਣ ਦੇ ਬਿਆਨਾਂ ਦੇ ਆਧਾਰ ਉੱਤੇ ਮੱਖਣ ਸਿੰਘ ਖਿਲਾਫ ਖੁਦਕੁਸ਼ੀ ਲਈ ਮਜਬੂਰ ਕਰਨ ਤਹਿਤ ਮਾਮਲਾ ਦਰਜ ਕਰ ਦਿੱਤਾ ਹੈ।