ਪੋਕਸੋ ਅਦਾਲਤ ਨੇ ਸਿਰਫ਼ 26 ਦਿਨਾਂ ਵਿੱਚ ਹੀ ਫ਼ੈਸਲਾ ਸੁਣਾਇਆ
ਜੈਪੁਰ, 18 ਮਾਰਚ – ਰਾਜਸਥਾਨ ਦੇ ਝੁੰਝਨੁੰ ਜ਼ਿਲ੍ਹੇ ਦੀ ਵਿਸ਼ੇਸ਼ ਪਾਕਸੋ ਅਦਾਲਤ ਨੇ ਪੰਜ ਸਾਲ ਦੀ ਬੱਚੀ ਨਾਲ ਬਲਾਤਕਾਰ ਦੇ ਦੋਸ਼ ਵਿੱਚ 20 ਸਾਲਾ ਸੁਨੀਲ ਕੁਮਾਰ ਨੂੰ ਦੋਸ਼ੀ ਕਰਾਰ ਦੇ ਕੇ ਫਾਂਸੀ ਦੀ ਸਜ਼ਾ ਸੁਣਾਈ ਹੈ।
ਝੁੰਝੁਨੰੁ ਜ਼ਿਲ੍ਹੇ ਦੇ ਪਿਲਾਨੀ ਵਿੱਚ ਬੱਚੀ ਨਾਲ ਬਲਾਤਕਾਰ ਦੀ ਇਹ ਘਟਨਾ 19 ਫ਼ਰਵਰੀ ਨੂੰ ਵਾਪਰੀ ਸੀ। ਪੁਲਸ ਨੇ ਜਾਂਚ ਕਰਕੇ ਘਟਨਾ ਦੇ ਸਿਰਫ਼ ਨੌਂ ਦਿਨ ਬਾਅਦ ਅਦਾਲਤ ਵਿੱਚ ਦੋਸ਼ ਪੱਤਰ ਦਾਖ਼ਲ ਕੀਤਾ ਅਤੇ 40 ਗਵਾਹ ਪੇਸ਼ ਕਰ ਕੇ ਅਦਾਲਤ ਤੋਂ ਦੋਸ਼ੀ ਨੂੰ ਸਿਰਫ਼ 26 ਦਿਨਾਂ ਵਿੱਚ ਸਜ਼ਾ ਦਿਵਾ ਦਿੱਤੀ ਹੈ। ਐੱਸ ਐੱਸ ਪੀ ਹਵਾ ਸਿੰਘ ਘੁਮਰੀਆ ਨੇ ਦੱਸਿਆ ਕਿ 19 ਫਰਵਰੀ ਦੀ ਸ਼ਾਮ ਬੱਚੀ ਖੇਤ ਵਿੱਚ ਆਪਣੇ ਭੈਣ-ਭਰਾ ਨਾਲ ਖੇਡ ਰਹੀ ਤਾਂ ਸਕੂਟੀ ਉੱਤੇ ਆਏ ਸੁਨੀਲ ਕੁਮਾਰ ਨੇ ਉਸ ਨੂੰ ਅਗਵਾ ਕਰ ਲਿਆ। ਬੱਚੀ ਦੇ ਭੈਣ ਭਰਾ ਨੇ ਉਸ ਦਾ ਪਿੱਛਾ ਵੀ ਕੀਤਾ, ਪਰ ਉਹ ਉਸ ਨੂੰ ਫੜ ਨਹੀਂ ਸੀ ਸਕੇ। ਬੱਚੀ ਰਾਤ ਨੂੰ ਸੁਨਸਾਨ ਜਗਾ ਉੱਤੇ ਲਹੂ-ਲੁਹਾਨ ਸਥਿਤੀ ਵਿੱਚ ਮਿਲੀ ਸੀ। ਘਟਨਾ ਦੇ ਪੰਜ ਘੰਟੇ ਬਾਅਦ ਹੀ ਪੁਲਸ ਨੇ ਸ਼ਾਹਪੁਰ ਨਿਵਾਸੀ ਕੁਮਾਰ ਨੂੰ ਗ਼੍ਰਿਫ਼ਤਾਰ ਕਰ ਲਿਆ। ਘੁਮਰੀਆ ਨੇ ਦੱਸਿਆ ਕਿ ਇਸ ਕੇਸ ਵਿੱਚ 40 ਤੋਂ ਵੱਧ ਗਵਾਹ ਤੇ ਕਰੀਬ 250 ਦਸਤਾਵੇਜ਼ ਪੇਸ਼ ਕੀਤੇ ਗਏ। ਪੁਲਸ ਨੇ ਇਸ ਕੇਸ ਵਿੱਚ ਰੋਜ਼ 12 ਤੋਂ 13 ਘੰਟੇ ਕੰਮ ਕਰ ਕੇ ਦੋਸ਼ ਪੱਤਰ ਦਾਖ਼ਲ ਕਰ ਦਿੱਤਾ। ਦੋਸ਼ੀ ਸੁਨੀਲ ਕੁਮਾਰ ਨੇ ਸੁਣਵਾਈ ਵੇਲੇ ਅਦਾਲਤ ਨੂੰ ਕਿਹਾ ਕਿ ਅਪਰਾਧ ਦਾ ਕਾਰਨ ਨਸ਼ਾ ਸੀ, ਪਰ ਉਸ ਦੀ ਇਸ ਦਲੀਲ ਨੂੰ ਅਦਾਲਤ ਨੇ ਨਹੀਂ ਮੰਨਿਆ, ਕਿਉਂਕਿ ਉਸ ਨੇ ਕਰੀਬ 40 ਕਿਲੋਮੀਟਰ ਸਕੂਟੀ ਚਲਾਈ ਅਤੇ ਬੱਚੀ ਨੂੰ ਚਾਕਲੇਟ ਅਤੇ ਚਿਪਸ ਵੀ ਦਿਵਾਏ ਸੀ, ਜਿਸ ਦਾ ਅਰਥ ਹੈ ਕਿ ਉਹ ਹੋਸ਼ ਵਿੱਚ ਸੀ। ਅਦਾਲਤ ਵਿੱਚ ਉਸ ਨੇ ਇਹ ਮੰਨਿਆ ਕਿ ਉਹ ਨਸ਼ੇ ਦੇ ਇਲਾਵਾ ਅਸ਼ਲੀਲ ਵੀਡਿਓ ਦੇਖਦਾ ਸੀ, ਜਿਸ ਨੂੰ ਅਦਾਲਤ ਨੇ ਗੰਭੀਰ ਮੰਨਿਆ।

Read More Latest Crime News