ਚੰਡੀਗੜ੍ਹ, 30 ਜਨਵਰੀ – ਪੰਜਾਬ ਵਿੱਚ ਇੱਕ ਨਵੇਂ ਸੱਦੇ ਦੀ ਗੰੂਜ ਪਈ ਹੈ। ਪਿੰਡੋ ਪਿੰਡ ‘ਇੱਕ ਘਰ-ਇੱਕ ਜੀਅ’ ਦੇ ਦਿੱਲੀ ਪੁੱਜਣ ਦਾ ਸੁਨੇਹਾ ਘੁੰਮਣ ਲੱਗ ਪਿਆ ਹੈ। ਦਿੱਲੀ ਵਿੱਚ ਕਿਸਾਨ ਧਰਨੇ ਉੱਤੇ ਹਮਲੇ ਮਗਰੋਂ ਪੰਜਾਬ ਦੇ ਲੋਕਾਂ ਨੇ ਫਿਰ ਉਬਾਲ ਖਾਧਾ ਅਤੇ ਸੈਂਕੜੇ ਪੰਚਾਇਤਾਂ ਨੇ ਮਤੇ ਪਾਸ ਕੀਤੇ ਹਨ ਤਾਂ ਜੋ ‘ਦਿੱਲੀ ਮੋਰਚੇ’ ਨੂੰ ਫਿਰ ਸਿਖ਼ਰ ਉੱਤੇ ਲਿਜਾਇਆ ਜਾ ਸਕੇ। ਕਿਸਾਨ ਧਿਰਾਂ ਨੇ ਦੋ ਦਿਨਾਂ ਵਿੱਚ ਪਿੰਡਾਂ ਅਤੇ ਸ਼ਹਿਰਾਂ ਵਿੱਚ ਲਾਮਬੰਦੀ ਤੇਜ਼ ਕਰ ਦਿੱਤੀ ਹੈ ਅਤੇ ਨੌਜਵਾਨ ਕਲੱਬਾਂ ਅਤੇ ਸ਼ਹਿਰੀ ਲੋਕ ਵੀ ‘ਦਿੱਲੀ ਮੋਰਚੇ’ ਦੀ ਢਾਲ ਬਣਨ ਨੂੰ ਤਿਆਰ ਹੋ ਗਏ ਹਨ।
ਫਗਵਾੜਾ ਤੋਂ ਅੱਜ 30 ਜਨਵਰੀ ਨੂੰ ਕਰੀਬ 100 ਵਾਹਨਾਂ ਦਾ ਕਾਫਲਾ ਦਿੱਤੀ ਲਈ ਰਵਾਨਾ ਹੋਇਆ ਹੈ। ਭਾਰਤੀ ਕਿਸਾਨ ਯੂਨੀਅਨ (ਦੋਆਬਾ) ਦੀ ਅਗਵਾਈ ਵਿੱਚ ਟੌਲ ਪਲਾਜ਼ਾ ਟਾਂਡਾ ਤੋਂ ਇੱਕ ਵੱਡਾ ਕਾਫਲਾ ਦਿੱਲੀ ਜਾਵੇਗਾ ਅਤੇ ਕੰਢੀ ਕਿਸਾਨ ਸੰਘਰਸ਼ ਕਮੇਟੀ ਦੀ ਅਗਵਾਈ ਵਿੱਚ 1 ਫਰਵਰੀ ਨੂੰ ਜ਼ਿਲ੍ਹਾ ਹੁਸ਼ਿਆਰਪੁਰਤੋਂ ਲੰਮਾ ਕਾਫਲਾ ਤੁਰੇਗਾ। ਸੰਘਰਸ਼ ਕਮੇਟੀ ਦੇ ਮੀਤ ਚੇਅਰਮੈਨ ਜਰਨੈਲ ਸਿੰਘ ਗੜ੍ਹਦੀਵਾਲਾ ਨੇ ਦੱਸਿਆ ਕਿ ਦੋਆਬੇ ਦੇ ਪਿੰਡਾਂ ਦੇ ਗੁਰੂ ਘਰਾਂਤੋਂ ਮੁਨਿਆਦੀ ਕਰਵਾ ਕੇ ਦਿੱਲੀ ਪੁੱਜਣ ਲਈ ਕਿਹਾ ਗਿਆ ਹੈ। ਇਸ ਮੌਕੇ ਕਈ ਪੰਚਾਇਤਾਂ ਨੇ ‘ਇੱਕ ਘਰ-ਇੱਕ ਜੀਅ’ ਯਕੀਨੀ ਕਰਨ ਲਈ ਜੁਰਮਾਨੇ ਵੀ ਰੱਖ ਦਿੱਤੇ ਹਨ। ਪਟਿਆਲਾ ਦੇ ਪਿੰਡ ਵਜੀਦਪੁਰ ਦੀ ਪੰਚਾਇਤ ਨੇ ਕੱਲ੍ਹ ਇਕੱਠ ਕਰਕੇ ਹਰ ਇੱਕ ਘਰ ਵਿੱਚੋਂ ਇੱਕ ਮੈਂਬਰ ਦੇ ਦਿੱਲੀ ਜਾਣ ਦਾ ਮਤਾ ਪਾਇਆ ਹੈ। ਸਰਪੰਚ ਮਨਦੀਪ ਕੌਰ ਦੀ ਅਗਵਾਈ ਹੇਠ ਪਾਏ ਗਏ ਮਤੇ ਅਨੁਸਾਰ ਦਿੱਲੀ ਨਾ ਜਾਣ ਵਾਲੇ ਪਰਵਾਰ ਨੂੰ 1500 ਰੁਪਏ ਜੁਰਮਾਨਾ ਦੇਣਾ ਹੋਵੇਗਾ। ਬਰਨਾਲਾ ਦੇ ਪਿੰਡ ਛੰਨਾ ਵਿੱਚੋਂ ਕੱਲ੍ਹ ਟਰੈਕਟਰ ਟਰਾਲੀਆਂ ਦਿੱਲੀ ਲਈ ਰਵਾਨਾ ਹੋਏ ਹਨ। ਮਤੇ ਅਨੁਸਾਰ ਪ੍ਰਤੀ ਏਕੜ 100 ਰੁਪਏ ਫੰਡ ਵੀ ਭੇਜਿਆ ਜਾਣਾ ਹੈ ਅਤੇ ਜਿਸ ਘਰਦਾ ਇੱਕ ਜੀਅ ਦਿੱਲੀ ਨਹੀਂ ਜਾਵੇਗਾ, ਉਸ ਨੂੰ 300 ਰੁਪਏ ਰੋਜ਼ ਦੇ ਹਿਸਾਬ ਨਾਲ ਹਫ਼ਤੇ ਭਰ ਦਾ ਖਰਚ ਦੇਣਾ ਪਵੇਗਾ। ਮਾਨਸਾ ਦੇ ਪਿੰਡ ਜਟਾਣਾ ਖੁਰਦ ਵਿੱਚ ਵੀ ਇਹੋ ਮਤਾ ਪਾਸ ਕੀਤਾ ਗਿਆ ਹੈ।ਜਟਾਣਾ ਖੁਰਦ ਦੇ ਗੁਰੂ ਘਰ ਵਿੱਚ ਰੋਜ਼ ਮੁਨਿਆਦੀ ਹੋਵੇਗੀ ਅਤੇ ਹਰ ਘਰ ਤੋਂ ਇੱਕ ਜਣਾ ਦਿੱਲੀ ਜਾਵੇਗਾ। ਸਾਦਿਕ ਨੇੜਲੇ ਪਿੰਡ ਸਾਧੂਵਾਲਾ ਦੇ ਲੋਕਾਂ ਨੇ ਇਕੱਠੇ ਹੋ ਕੇ ਘਰਾਂ ਦੀ ਸੂਚੀ ਬਣਾਈ ਅਤੇ ਹਰ ਘਰ ਵਿੱਚੋਂ ਇੱਕ ਜਣਾ ਰੋਟੇਸ਼ਨ ਨਾਲ ਜਾਵੇਗਾ। ਮੁਕਤਸਰ ਦੇ ਪਿੰਡ ਅਕਾਲਗੜ੍ਹਤੋਂ ਕੱਲ੍ਹ ਕਿਸਾਨਾਂ ਦਾ ਜਥਾ ਗਿਆ ਹੈ ਜਦੋਂ ਕਿ ਪਿੰਡ ਭਾਈਰੂਪਾ ਵਿੱਚੋਂ ਪਹਿਲੀ ਫਰਵਰੀ ਨੂੰ ਵੱਡਾ ਕਾਫਲਾ ਦਿੱਲੀ ਜਾਵੇਗਾ। ਬਠਿੰਡਾ ਦੇ ਪਿੰਡ ਵਿਰਕ ਖੁਰਦ ਦੀ ਪੰਚਾਇਤ ਨੇ ਦਿੱਲੀ ਨਾ ਜਾਣ ਵਾਲੇ ਲਈ 1500 ਰੁਪਏ ਜੁਰਮਾਨਾ ਅਤੇ ਉਸ ਵਿਅਕਤੀ ਦਾ ਸਮਾਜਿਕ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ।
ਇਸੇ ਤਰ੍ਹਾਂ ਕੱਲ੍ਹ ਭਦੌੜ ਵਿੱਚ ਨੌਜਵਾਨ ਕਲੱਬਾਂ, ਤਰਕਸ਼ੀਲ ਸੁਸਾਇਟੀ, ਮੋਹਤਬਰ ਅਤੇ ਬੀ ਕੇ ਯੂ (ਡਕੌਂਦਾ) ਦਾ ਇਕੱਠ ਹੋਇਆ, ਜਿੱਥੇਰੋਜ਼ ਦਿੱਲੀ ਜਥੇ ਭੇਜਣ ਦਾ ਫ਼ੈਸਲਾ ਹੋਇਆ ਹੈ। ਬਠਿੰਡਾ ਦੇ ਪਿੰਡ ਕਰਾੜਵਾਲਾ ਦੀ ਪੰਚਾਇਤ ਨੇ ਮਤਾ ਪਾਸ ਕੀਤਾ ਹੈ ਕਿ ਹਰ ਵਾਰਡਤੋਂ 10-10 ਬੰਦੇ ਜਾਣਗੇ। ਜੋ ਨਹੀਂ ਜਾਵੇਗਾ, ਉਸ ਨੂੰ 2100 ਰੁਪਏ ਜੁਰਮਾਨਾ ਦੇਣਾ ਪਵੇਗਾ। ਦਿੱਲੀ ਮੋਰਚੇ ਵਿੱਚ ਜੋ ਕਿਸੇ ਤਰ੍ਹਾਂ ਦਾ ਨਸ਼ਾ ਜਾਂ ਹੁੱਲੜਬਾਜ਼ੀ ਕਰੇਗਾ, ਉਸ ਨੂੰ 5100 ਰੁਪਏ ਦਾ ਜੁਰਮਾਨਾ ਰੱਖਿਆ ਗਿਆ ਹੈ। ਪਿੰਡ ਕਮਾਲੂ ਸਵੈਚ ਵਿੱਚ ਫ਼ੈਸਲਾ ਹੋਇਆ ਕਿ ਜੋ ਵਿਅਕਤੀ ਦਿੱਲੀ ਨਾ ਗਿਆ, ਉਸ ਦੇ ਫਲੈਕਸ ਲਾ ਕੇ ਫੋਟੋ ਲਾਈ ਜਾਵੇਗੀ। ਇੱਥੇ ਕੱਲ੍ਹ ਬੀ ਕੇ ਯੂ (ਸਿੱਧੂਪੁਰ) ਨੇ ਅਗਵਾਈ ਕੀਤੀ। ਦੋ ਦਿਨਾਂ ਵਿੱਚ ਸਾਰੇ ਪੰਜਾਬ ਵਿੱਚ ਰੋਹ ਦੀ ਲਹਿਰ ਚੱਲ ਪਈ ਹੈ ਜਿਸ ਵਿੱਚ ਹਰ ਪਿੰਡ ਦਿੱਲੀ ਜਾਣ ਦਾ ਪ੍ਰਣ ਲੈ ਰਿਹਾ ਹੈ।