ਨੂਰਪੁਰਬੇਦੀ, 15 ਫਰਵਰੀ – ਦੇਰ ਰਾਤ ਤਹਿਸੀਲ ਕੰਪਲੈਕਸ ਲਾਗੇ ਨੂੁਰਪੁਰਬੇਦੀ-ਗੜਸ਼ੰਕਰ ਮੁੱਖ ਸੜਕ ਉੱਤੇ ਪਿੱਛੋਂ ਆਈ ਤੇਜ਼ ਰਫ਼ਤਾਰ ਕਾਰ ਦੀ ਟੱਕਰ ਨਾਲ ਟਰੈਕਟਰ ਦੇ ਚਾਲਕ ਦੀ ਮੌਤ ਹੋ ਗਈ। ਮ੍ਰਿਤਕ ਨੌਜਵਾਨ ਕਾਰ ਮਕੈਨਿਕ ਸੀ, ਜੋ ਦੁਕਾਨ ਬੰਦ ਕਰਨ ਪਿੱਛੋਂ ਆਪਣੇ ਟਰੈਕਟਰ ਤੇ ਵਾਪਸ ਘਰ ਪਰਤ ਰਿਹਾ ਸੀ। ਉਸ ਦੀ ਪਛਾਣ ਦਵਿੰਦਰ ਸਿੰਘ (38) ਪੁੱਤਰ ਚਰਨ ਦਾਸ, ਪਿੰਡ ਸੈਣੀਮਾਜਰਾ, ਥਾਨਾ ਨੂਰਪੁਰਬੇਦੀ ਵਜੋਂ ਹੋਈ ਹੈ।
ਦਵਿੰਦਰ ਸਿੰਘ ਰਾਤ ਕਰੀਬ ਸਾਢੇ 9 ਵਜੇ ਆਪਣੀ ਦੁਕਾਨ ਬੰਦ ਕਰ ਕੇ ਟਰੈਕਟਰ ਉੱਤੇ ਘਰ ਆ ਰਿਹਾ ਸੀ ਕਿ ਪਿੱਛੋਂ ਆਈ ਤੇਜ਼ ਰਫ਼ਤਾਰ ਕਾਰ ਦੇ ਟੱਕਰ ਮਾਰਨ ਉੱਤੇ ਉਕਤ ਟਰੈਕਟਰ ਸੜਕ ਉਤੇ ਪਲਟ ਗਿਆ। ਕਾਰ ਚਾਲਕ ਕਾਰ ਸਮੇਤ ਫਰਾਰ ਹੋਣ ਵਿੱਚ ਸਫ਼ਲ ਹੋ ਗਿਆ, ਪਰ ਉਸ ਦੀ ਪਛਾਣ ਹੋ ਗਈ ਹੈ ਤੇ ਮ੍ਰਿਤਕ ਨੌਜਵਾਨ ਦੇ ਪਿਤਾ ਚਰਨ ਦਾਸ ਦੇ ਬਿਆਨਾਂ ਉੱਤੇ ਫੀਗੋ ਕਾਰ ਦੇ ਚਾਲਕ ਵਿਰੁੱਧ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।