ਮੁੰਬਈ, 27 ਫਰਵਰੀ – ਬਾਲੀਵੁੱਡ ਹੀਰੋਇਨ ਦੀਪਿਕਾ ਪਾਦੂਕੋਨ ਨੂੰ ਇਥੇ ਖਾਰ ਇਲਾਕੇ ਵਿੱਚ ਇੱਕ ਰੈਸਟੋਰੈਨਟ ’ਚੋਂ ਨਿਕਲਦਿਆਂ ਕੁਝ ਲੋਕਾਂ ਨੇ ਘੇਰ ਲਿਆ। ਇਹ ਘਟਨਾ ਦੇਰ ਰਾਤ ਵਾਪਰੀ, ਜਿਸ ਦੀਆਂ ਕੁਝ ਤਸਵੀਰਾਂ ਅਤੇ ਵੀਡੀਓਜ਼ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਈਆਂ ਹਨ।
ਵਾਇਰਲ ਹੋਈ ਵੀਡੀਓ ਵਿੱਚ ਦੀਪਿਕਾ ਰੈਸਟੋਰੈਂਟ ’ਚੋਂ ਨਿਕਲਦੀ ਦਿਖਾਈ ਦਿੰਦੀ ਹੈ। ਜਦੋਂ ਉਹ ਬਾਹਰ ਆਈ ਤਾਂ ਕੁਝ ‘ਟਿਸ਼ੂ ਪੇਪਰ’ ਵੇਚਣ ਵਾਲੀਆਂ ਔਰਤਾਂ ਉਸ ਕੋਲ ਪਹੁੰਚ ਗਈਆਂ। ਉਹ ਔਰਤਾਂ ਦੀਪਿਕਾ ਨੂੰ ਧੱਕੇ ਨਾਲ ‘ਟਿਸ਼ੂ ਪੇਪਰ’ ਦੇਣ ਦੀ ਜ਼ਿੱਦ ’ਤੇ ਅੜ ਗਈਆਂ ਅਤੇ ਭੀੜ ਦੀਪਿਕਾ ਦੇ ਦੁਆਲੇ ਇਕੱਠੀ ਹੋ ਗਈ।। ਦੀਪਿਕਾ ਨੇ ਇਸ ਸਥਿਤੀ ’ਤੇ ਆਰਾਮ ਨਾਲ ਕਾਬੂ ਪਾ ਲਿਆ ਅਤੇ ਹੱਸਦੀ ਹੋਈ ਕਾਰ ਵੱਲ ਤੁਰ ਪਈ, ਪਰ ਇੰਨੇ ਨੂੰ ਭੀੜ ’ਚੋਂ ਕਿਸੇ ਨੇ ਉਸ ਦੀ ਬਾਂਹ ਵਿੱਚ ਪਾਇਆ ਬੈਗ ਖਿੱਚ ਲਿਆ। ਜਦੋਂ ਬੈਗ ਝਪਟਿਆ ਤਾਂ ਦੀਪਿਕਾ ਇਹ ਕਹਿੰਦੀ ਸੁਣੀ ਗਈ, ‘‘ਇੱਕ ਮਿੰਟ, ਇੱਕ ਮਿੰਟ” ਪਰ ਉਹ ਬੇਵੱਸ ਨਜ਼ਰ ਆਈ। ਦੀਪਿਕਾ ਦੇ ਸੁਰੱਖਿਆ ਕਰਮੀ ਨੇ ਦੋਸ਼ੀ ਕੋਲੋਂ ਬੈਗ ਖੋਹ ਕੇ ਉਸ ਨੂੰ ਕਾਰ ਵਿੱਚ ਫੜਾ ਦਿੱਤਾ ਅਤੇ ਆਖਿਆ ਕਿ ਜ਼ਰੂਰੀ ਸਾਮਾਨ ਚੈਕ ਕਰ ਲਓ, ਕੁਝ ਗਵਾਚਾ ਤਾਂ ਨਹੀਂ।

Read More Latest Entertainment News