ਬਰਨਾਲਾ, 6 ਫਰਵਰੀ – ਪੰਜਾਬ ਦੀਆਂ ਨਗਰ ਕੌਂਸਲ ਚੋਣਾਂ ਵਿੱਚ ਭਾਰਤੀ ਜਨਤਾ ਪਾਰਟੀ ਦੇ ਸਰਗਰਮ ਆਗੂ ਵੀ ਆਪਣੀ ਪਾਰਟੀ ਦੀ ਪਛਾਣ ਲੁਕੋ ਕੇ ਚੋਣਾਂ ਲੜਨ ਲੱਗ ਪਏ ਹਨ।
ਬਰਨਾਲਾ ਦੀ ਨਗਰ ਕੌਂਸਲ ਚੋਣ ਵਿੱਚ ਨਤੀਜੇ ਆਉਣ ਤੋਂ ਪਹਿਲਾਂ ਹੀ ਭਾਜਪਾ ਨਿਰਾਸ਼ਾ ਦੀ ਮਾਰ ਹੇਠ ਆਉਂਦੀ ਜਾ ਰਹੀ ਹੈ। ਕੁਝ ਮਹੀਨੇ ਪਹਿਲਾਂ ਤੱਕ ਕੌਂਸਲ ਦੀ ਪ੍ਰਧਾਨਗੀ ਜਿੱਤਣ ਦਾ ਦਾਅਵਾ ਕਰਨ ਵਾਲੀ ਜ਼ਿਲ੍ਹਾ ਭਾਜਪਾ ਨੇ ਪਹਿਲਾਂ 32 ਵਿੱਚੋਂ ਸਿਰਫ਼ 17 ਸੀਟਾਂ ਉੱਤੇ ਆਪਣੇ ਉਮੀਦਵਾਰ ਐਲਾਨੇ ਸਨ, ਇਨ੍ਹਾਂ ਵਿੱਚੋਂ ਵੀ ਸਿਰਫ 14 ਨੇ ਹੀ ਪਾਰਟੀ ਟਿਕਟ ਉੱਤੇ ਕਾਗਜ਼ ਭਰੇ ਹਨ।ਭਾਜਪਾ ਯੁਵਾ ਮੋਰਚਾ ਦੇ ਸੂਬਾ ਸੈਕਟਰੀ ਨੀਰਜ ਜਿੰਦਲ ਨੇ 15 ਨੰਬਰ ਵਾਰਡ ਤੋਂ ਆਪਣੀ ਮਾਤਾ ਸਰੋਜ ਦੇਵੀ ਲਈ ਪਾਰਟੀ ਤੋਂ ਟਿਕਟ ਲੈਣ ਪਿੱਛੋਂ ਆਜ਼ਾਦ ਉਮੀਦਵਾਰ ਵਜੋਂ ਕਾਗਜ਼ ਭਰਵਾਏ ਹਨ। ਭਾਜਪਾ ਉਮੀਦਵਾਰਾਂ ਨੂੰ ਟਿਕਟਾਂ ਵੰਡਣ ਵਾਲੇ ਜ਼ਿਲ੍ਹਾ ਪ੍ਰਧਾਨ ਯਾਦਵਿੰਦਰ ਸ਼ੰਟੀ ਦੀ ਪਤਨੀ 27 ਨੰਬਰ ਵਾਰਡ ਵਿੱਚ ਪਾਰਟੀ ਨਿਸ਼ਾਨ ਤੋਂ ਚੋਣ ਲੜ ਰਹੀ ਹੈ, ਪਰ ਜ਼ਿਲ੍ਹਾ ਪ੍ਰਧਾਨ ਨੇ ਆਪਣੀ ਪਤਨੀ ਨੂੰ ਵੋਟ ਪਾਉਣ ਲਈਵੋਟਰਾਂ ਨੂੰ ਅਪੀਲ ਦੇ ਇਸ਼ਤਿਹਾਰ ਲਾਏ ਹਨ ਤਾਂ ਉਨ੍ਹਾਂ ਉੱਤੇ ਨਾ ਪਾਰਟੀ ਦਾ ਚਿੰਨ੍ਹ ‘ਕਮਲ’ ਦਾ ਫੁੱਲ ਹੈ ਤੇ ਨਾ ਪਾਰਟੀ ਦਾ ਕੋਈ ਵੇਰਵਾ ਪਾਇਆ ਹੈ। ਵਾਰਡ ਦੇ ਵੋਟਰ ਭੰਬਲਭੂਸੇ ਵਿੱਚ ਹਨ ਕਿ ਭਾਜਪਾ ਪ੍ਰਧਾਨ ਦੀ ਪਤਨੀ ਮੰਜੂ ਸ਼ਰਮਾ ਨੂੰ ਕਿਸ ਚੋਣ ਨਿਸ਼ਾਨ ਉੱਤੇ ਵੋਟ ਪਾਉਣੀ ਹੈ।
ਸ਼ਹਿਰ ਦੇ 14 ਵਾਰਡਾਂ ਵਿੱਚ ਭਾਜਪਾ ਦੇ ਉਮੀਦਵਾਰਾਂ ਨੇ ਆਪਣੇ ਕਾਗਜ਼ ਭਰੇ ਹਨ ਪਰ ਪੂਰੇ ਸ਼ਹਿਰ ਵਿੱਚ ਭਾਜਪਾ ਦੇ ਨਾ ਚੋਣ ਨਿਸ਼ਾਨ ਵਾਲੇ ਵੱਡੇ ਛੋਟੇ ਪੋਸਟਰ ਅਤੇ ਨਾ ਝੰਡੇ ਨਜ਼ਰ ਆ ਰਹੇ ਹਨ। ਭਾਜਪਾ ਦੇ ਜ਼ਿਲ੍ਹਾ ਪ੍ਰਧਾਨ ਯਾਦਵਿੰਦਰ ਸ਼ੰਟੀ ਨੇ ਕਿਹਾ ਕਿ ਵਾਰਡ ਨੰਬਰ 27 ਵਿੱਚ ਪਾਰਟੀ ਦੇ ਬਿਨਾਂ ਚੋਣ ਨਿਸ਼ਾਨ ਤੋਂ ਲੱਗੇ ਪੋਸਟਰ 26 ਜਨਵਰੀ ਤੋਂ ਪਹਿਲਾਂ ਦੇ ਹਨ। ਜਲਦੀ ਹੀ ਪਾਰਟੀ ਦੇ ਚੋਣ ਨਿਸ਼ਾਨ ਵਾਲੇ ਪੋਸਟਰ ਤੇ ਝੰਡੇ ਲਾਏ ਜਾਣਗੇ।