ਤਲਵਾੜਾ, 5 ਜਨਵਰੀ – ਪੌਂਗ ਡੈਮ ਵੈਟਲੈਂਡ ਵਿੱਚ ਬਰਡ ਫਲੂ ਨੇ ਦਸਤਕ ਦੇ ਦਿੱਤੀ ਹੈ। ਜਲੰਧਰ ਵਿਚਲੇ ਨਾਰਥ ਰੀਜਨਲ ਡਿਸੀਸੀਜ਼ ਡਾਇਗਨੋਸਟਿਕ ਲੈਬ ‘ਚ ਹੋਈ ਜਾਂਚ ਤੋਂ ਬਾਅਦ ਇਹ ਖੁਲਾਸਾ ਹੋਇਆ ਹੈ, ਜਿੱਥੇ ਦੋ ਪੰਛੀਆਂ ਦੀਆਂ ਲਾਸ਼ਾਂ ਦੀ ਜਾਂਚ ਵਿੱਚ ਬਰਡ ਫਲੂ ਦੇ ਲੱਛਣ ਸਾਹਮਣੇ ਆਏ ਹਨ। ਇਨ੍ਹਾਂ ਦੋ ਪੰਛੀਆਂ ਦੇ ਸੈਂਪਲ ਇਸ ਲੈਬ ਵਿੱਚ ਜਾਂਚ ਲਈ ਹਿਮਾਚਲ ਪ੍ਰਦੇਸ਼ ਸਰਕਾਰ ਵੱਲੋਂ ਭੇਜੇ ਗਏ ਸਨ।
ਲੈਬ ਦੇ ਇੰਚਾਰਜ ਡਾ: ਐਮ ਪੀ ਸਿੰਘ ਨੇ ਕਿਹਾ ਕਿ ਬੱਤਖਾਂ ਦੇ ਦੋ ਸੈਂਪਲ ਜਾਂਚ ਲਈ ਆਏ ਸਨ, ਜਿਨ੍ਹਾਂ ਵਿੱਚ ਬਰਡ ਫਲੂ ਦੇ ਲੱਛਣ ਮਿਲੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਬਰਡ ਫਲੂ ਦੇ ਲੱਛਣ ਮਿਲਣ ਤੋਂ ਬਾਅਦ ਪਸ਼ੂ ਪਾਲਣ ਵਿਭਾਗ ਨੇ ਪੰਜਾਬ ਵਿੱਚ ਵੀ ਅਲਰਟ ਜਾਰੀ ਕਰ ਦਿੱਤਾ ਹੈ। ਪੌਂਗ ਵੈਟਲੈਂਡ ਦੇ ਦਸ ਕਿਲੋਮੀਟਰ ਘੇਰੇ ਵਿੱਚ ਸਰਵੇ ਕੀਤਾ ਜਾਵੇਗਾ। ਕੱਲ੍ਹ ਪੌਂਗ ਡੈਮ ਵੈਟਲੈਂਡ ‘ਚ 627 ਵਿਦੇਸ਼ੀ ਪੰਛੀਆਂ ਦੀ ਮੌਤ ਹੋ ਗਈ ਅਤੇ ਇਨ੍ਹਾਂ ‘ਚੋਂ 122 ਧਮੇਟਾ ਵੀਟ ਅਤੇ 505 ਨਗਰੋਟਾ ਸੂਰੀਆਂ ‘ਚ ਮ੍ਰਿਤਕ ਪਾਏ ਗਏ ਹਨ। ਪੌਂਗ ਡੈਮ ਵੈਟਲੈਂਡ ‘ਚ ਮ੍ਰਿਤਕ ਪੰਛੀਆਂ ਦਾ ਅੰਕੜਾ ਵਧ ਕੇ 2401 ਹੋ ਗਿਆ ਹੈ। ਜਾਂਚ ਲਈ ਵਾਈਲਡ ਲਾਈਫ ਇੰਸਟੀਚਿਊਟ ਆਫ ਇੰਡੀਆ, ਦੇਹਰਾਦੂਨ ਤੋਂ ਟੀਮ ਵੀ ਪੌਂਗ ਡੈਮ ਪੁੱਜ ਗਈ ਹੈ। ਇਸੇ ਦੌਰਾਨ ਪੌਂਗ ਝੀਲ ਵਿੱਚ ਸੈਲਾਨੀਆਂ ਦੇ ਆਉਣ ‘ਤੇ ਰੋਕ ਲਾ ਦਿੱਤੀ ਗਈ ਹੈ।ਹਿਮਾਚਲ ਪ੍ਰਦੇਸ਼ ਪਸ਼ੂ ਪਾਲਣ ਮੰਤਰੀ ਵਰਿੰਦਰ ਕੰਵਰ ਨੇ ਕਿਹਾ ਹੈ ਕਿ ਕਾਂਗੜਾ ਜ਼ਿਲੇ੍ਹ ਵਿੱਚ 10 ਕਿਲੋਮੀਟਰ ਦੇ ਘੇਰੇ ਵਿੱਚ ਪੋਲਟਰੀ ਉਤਪਾਦ ਨਸ਼ਟ ਕੀਤੇ ਜਾਣਗੇ। ਬਰਡ ਫਲੂ ਨੂੰ ਇਨਸਾਨ ਵਿੱਚ ਫੈਲਣ ਤੋਂ ਰੋਕਣ ਲਈ ਪੁਖਤਾ ਇੰਤਜ਼ਾਮ ਕੀਤੇ ਗਏ ਹਨ।
ਕੋਰੋਨਾ ਵਾਇਰਸ ਦੀ ਮਹਾਮਾਰੀ ਦੌਰਾਨ ਮੱਧ ਪ੍ਰਦੇਸ਼, ਪੰਜਾਬ, ਰਾਜਸਥਾਨ ਤੇ ਹਿਮਾਚਲ ਪ੍ਰਦੇਸ਼ ਦੇ ਨਾਲ ਕੇਰਲ ਰਾਜ ਵੀਬਰਡ ਫਲੂ ਦੀ ਲਪੇਟ ‘ਚ ਆ ਗਿਆ ਹੈ। ਇਨ੍ਹਾਂ ਰਾਜਾਂ ਵਿੱਚ ਪਿਛਲੇ ਕੁਝ ਦਿਨਾਂ ਵਿੱਚ ਸੈਂਕੜੇ ਪੰਛੀਆਂ ਦੀ ਮੌਤ ਹੋ ਗਈ ਹੈ। ਬਿਹਾਰ, ਝਾਰਖੰਡ ਤੇ ਉਤਰਾਖੰਡ ‘ਚ ਸੂਬਾ ਸਰਕਾਰਾਂ ਨੇ ਚੌਕਸੀ ਵਰਤਦੇ ਹੋਏ ਅਲਰਟ ਜਾਰੀ ਕੀਤਾ ਹੈ।
ਦੱਸਿਆ ਜਾਂਦਾ ਹੈ ਕਿ ਏਵੀਅਨ ਇੰਫਲੂਏਂਜ਼ਾ ਵਾਇਰਸ ਤੋਂ ਹੋਣ ਵਾਲੀ ਇਸ ਬਿਮਾਰੀ ਦੇ ਨਾਲ ਪੰਛੀ ਹੀ ਨਹੀਂ, ਮਨੁੱਖ ਵੀ ਪ੍ਰਭਾਵਤ ਹੋ ਸਕਦੇ ਹਨ। ਇਸ ਲਈ ਸਾਵਧਾਨੀ ਵਰਤਦੇ ਹੋਏ ਹਿਮਾਚਲ ਪ੍ਰਦੇਸ਼ ‘ਚ ਮੱਛੀ, ਮੁਰਗੇ ਤੇ ਆਂਡਿਆਂ ਦੀ ਵਿਕਰੀ ‘ਤੇ ਪਾਬੰਦੀ ਲਾ ਦਿੱਤੀ ਗਈ ਹੈ।ਰਾਜਸਥਾਨ ‘ਚ ਕੱਲ੍ਹ ਸੂਬੇ ਵਿੱਚ 110 ਪੰਛੀਆਂ ਦੀ ਮੌਤ ਤੋਂ ਚਿੰਤਤ ਹੋਏ ਗਵਰਨਰ ਕਲਰਾਜ ਮਿਸ਼ਰ ਨੇ ਸੂਬਾ ਸਰਕਾਰ ਦੇ ਖੇਤੀ ਮੰਤਰੀ ਲਾਲਚੰਦ ਕਟਾਰੀਆ ਤੋਂ ਬਰਡ ਫਲੂ ‘ਤੇ ਕੰਟਰੋਲ ਬਾਰੇ ਕੀਤੀਆਂ ਜਾ ਰਹੀਆਂ ਕੋਸ਼ਿਸ਼ਾਂ ਦੀ ਜਾਣਕਾਰੀ ਮੰਗੀ ਹੈ।
ਮੱਧ ਪ੍ਰਦੇਸ਼ ਵਿੱਚ ਬਰਡ ਫਲੂ ਦੇ ਕੇਸਾਂ ਦੀ ਸ਼ੁਰੂਆਤ ਇੰਦੌਰ ਸ਼ਹਿਰ ਤੋਂ ਹੋਈ ਸੀ। ਇਥੇ ਪਿਛਲੇ ਇੱਕ ਹਫਤੇ ‘ਚ ਡੇਲੀ ਕਾਲਜ ਕੰਪਲੈਕਸ ਵਿੱਚ 148 ਕਾਂਵਾਂ ਦੀ ਮੌਤ ਹੋ ਚੁੱਕੀ ਹੈ। ਇਸ ਵਿੱਚ ਦੋ ਕਾਂਵਾਂ ਦੀਆਂ ਲਾਸ਼ਾਂ ਦੇ ਸੈਂਪਲ ਭੋਪਾਲ ਦੀ ਹਾਈ ਸਕਿਓਰਿਟੀ ਲੈਬ ‘ਚ ਭੇਜੇ ਗਏ ਤਾਂ ਉਨ੍ਹਾਂ ‘ਚ ਬਰਡ ਫਲੂ ਦੇ ਵਾਇਰਸ ਦੀ ਪੁਸ਼ਟੀ ਹੋਈ ਸੀ। ਇੰਦੌਰ ਵਿੱਚ ਡੇਲੀ ਕਾਲਜ ਕੰਪਲੈਕਸ ਦੇ ਇੱਕ ਕਿਲੋਮੀਟਰ ਘੇਰੇ ‘ਚ ਰਹਿਣ ਵਾਲੇ ਲੋਕਾਂ ਵਿੱਚ ਸਰਦੀ, ਖਾਂਸੀ ਤੇ ਬੁਖਾਰ ਦੇ ਲੱਛਣ ਮਿਲੇ ਹਨ, ਸਿਹਤ ਵਿਭਾਗ ਵੱਲੋਂ ਉਨ੍ਹਾਂ ਦਾ ਕੋਰੋਨਾ ਟੈਸਟ ਕਰਵਾਇਆ ਗਿਆ ਹੈ।