ਰੋਮ, 9 ਮਾਰਚ – ਟੋਕੀਓ ਓਲੰਪਿਕ ਦੀਆਂ ਤਿਆਰੀਆਂ ਦੇ ਦੌਰਾਨ ਭਾਰਤ ਦੇ ਪਹਿਲਵਾਨ ਬਜਰੰਗ ਪੂਨੀਆ ਨੇ ਆਖਰੀ ਤੀਹ ਸਕਿੰਟਾਂ ਵਿੱਚ ਦੋ ਪੁਆਇੰਟ ਬਣਾ ਕੇ ਮਾਟਿਓ ਰੈਂਕਿੰਗ ਕੁਸ਼ਤੀ ਸੀਰੀਜ਼ ਵਿੱਚ ਸੋਨ ਤਮਗਾ ਜਿੱਤ ਕੇ ਆਪਣਾ ਖਿਤਾਬ ਬਚਾਅ ਲਿਆ ਹੈ। ਇਸ ਦੇ ਨਾਲ ਹੀ ਉਹ ਆਪਣੇ ਭਾਰ ਵਰਗ ਵਿੱਚ ਫਿਰ ਸਿਖਰ ਉੱਤੇ ਪਹੁੰਚ ਗਿਆ ਹੈ। ਉਹ ਉਲੰਪਿਕ ਲਈ ਵੀ ਤਿਆਰ ਦੱਸਿਆ ਜਾਂਦਾ ਹੈ।
ਮੰਗੋਲੀਆ ਦੇ ਤੁਲਗਾ ਤੁਮੂਰ ਓਚਿਰ ਖਿਲਾਫ 65 ਕਿਲੋ ਵਰਗ ਦੇ ਫਾਈਨਲ ਵਿੱਚ ਬਜਰੰਗ ਅੰਤਿਮ ਪਲਾਂ ਤੱਕ 0-2 ਨਾਲ ਪਿੱਛੇ ਚੱਲ ਰਿਹਾ ਸੀ, ਪਰ ਆਖਰੀ ਤੀਹ ਸਕਿੰਟਾਂ ਵਿੱਚ ਉਸ ਨੇ ਦੋ ਪੁਆਇੰਟ ਬਣਾ ਕੇ ਸਕੋਰ ਬਰਾਬਰ ਕਰ ਲਿਆ। ਐਤਵਾਰ ਨੂੰ ਹੋਏ ਮੁਕਾਬਲੇ ਵਿੱਚ ਭਾਰਤੀ ਪਹਿਲਵਾਨ ਨੇ ਆਖਰੀ ਪੁਆਇੰਟ ਬਣਾਇਆ ਸੀ, ਜਿਸ ਆਧਾਰ ਉੱਤੇ ਉਸ ਨੂੰ ਜੇਤੂ ਐਲਾਨਿਆ ਗਿਆ। ਬਜਰੰਗ ਇਸ ਟੂਰਨਾਮੈਂਟ ਤੋਂ ਪਹਿਲਾਂ ਆਪਣੇ ਭਾਰ ਵਰਗ ਦੀ ਰੈਂਕਿੰਗ ਵਿੱਚ ਦੂਸਰੇ ਸਥਾਨ ਉੱਤੇ ਸੀ, ਪਰ ਇੱਥੇ 14 ਪੁਆਇੰਟ ਹਾਸਲ ਕਰ ਕੇ ਉਹ ਸਿਖਰ ਉੱਤੇ ਪਹੁੰਚ ਗਿਆ।
ਇਸੇ ਤਰ੍ਹਾਂ ਵਿਸ਼ਾਲ ਕਾਲੀਰਮਨ ਨੇ ਗੈਰ ਓਲੰਪਿਕ ਵਰਗ ਦੇ ਸੱਤਰ ਕਿਲੋ ਮੁਕਾਬਲੇ ਵਿੱਚ ਕਜ਼ਾਖਿਸਤਾਨ ਦੇ ਸੀਰਬਾਜ ਤਾਲਗਤ ਨੂੰ 5-1 ਨਾਲ ਹਰਾ ਕੇ ਕਾਂਸ਼ੀ ਦਾ ਤਮਗਾ ਹਾਸਲ ਕੀਤਾ। ਭਾਰਤ ਨੇ ਸਾਲ ਦੀ ਇਸ ਪਹਿਲੀ ਰੈਂਕਿੰਗ ਸੀਰੀਜ਼ ਵਿੱਚ ਸੱਤ ਤਮਗੇ ਜਿੱਤੇ। ਬੀਤੇ ਦਿਨ ਮਹਿਲਾ ਵਰਗ ਵਿੱਚ ਵਿਨੇਸ਼ ਫੋਗਾਟ ਨੇ ਸੋਨੇ ਦਾ ਅਤੇ ਸਰਿਤਾ ਮੋਰ ਨੇ ਚਾਂਦੀ ਦਾ ਤਮਗਾ ਜਿੱਤਿਆ ਸੀ।

Read More Sports News in Punjabi