ਅੰਮ੍ਰਿਤਸਰ, 29 ਮਾਰਚ – ਅਜਨਾਲਾ ਨੇੜਲੇ ਭਿੰਡੀਸੈਦਾਂ ਵਿੱਚ ਸ਼ਨੀਵਾਰ ਰਾਤ ਝਗੜਾ ਨਿਬੇੜਨ ਗਏ ਬਜ਼ੁਰਗ ਰਿਸ਼ਤੇਦਾਰ ਦੀ ਪਿਓ-ਪੁੱਤ ਨੇ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿੱਤੀ। ਜਦ ਬਜ਼ੁਰਗ ਦਾ ਬੇਟਾ ਘਟਨਾ ਵਾਲੀ ਜਗ੍ਹਾ ਪਹੁੰਚਿਆ ਤਾਂ ਦੋਵੇਂ ਦੋਸ਼ੀ ਫਰਾਰ ਹੋ ਚੁੱਕੇ ਸਨ। ਬਜ਼ੁਰਗ ਪਿਆਰਾ ਸਿੰਘ ਦੇ ਬੇਟੇ ਸਤਨਾਮ ਸਿੰਘ ਦੇ ਬਿਆਨ ਉਤੇ ਪੁਲਸ ਨੇ ਪਿੰਡ ਦੇ ਹਰਦੀਪ ਸਿੰਘ ਅਤੇ ਉਸ ਦੇ ਪਿਤਾ ਗਿਆਨ ਸਿੰਘ ਦੇ ਖਿਲਾਫ ਕਤਲ ਦਾ ਕੇਸ ਦਰਜ ਕੀਤਾ ਹੈ।
ਸਤਨਾਮ ਸਿੰਘ ਨੇ ਦੱਸਿਆ ਕਿ ਉਹ ਮਜ਼ਦੂਰੀ ਕਰ ਕੇ ਪਰਵਾਰ ਚਲਾਉਂਦਾ ਹੈ। ਦੋਸ਼ੀ ਹਰਦੀਪ ਉਨ੍ਹਾਂ ਦਾ ਦੂਰ ਦਾ ਰਿਸ਼ਤੇਦਾਰ ਹੈ। ਉਹ ਅਕਸਰ ਆਪਣੇ ਘਰ ਝਗੜਾ ਕਰਦਾ ਰਹਿੰਦਾ ਸੀ। ਹਰਦੀਪ ਦਾ ਸਾਰਾ ਪਰਵਾਰ ਉਸ ਦੇ ਵਿਹਾਰ ਤੋਂ ਕਾਫੀ ਪ੍ਰੇਸ਼ਾਨ ਸੀ। ਕੁਝ ਦਿਨ ਪਹਿਲਾਂ ਗਿਆਨ ਸਿੰਘ ਨੇ ਉਸ ਦੇ ਪਿਤਾ ਪਿਆਰਾ ਸਿੰਘ ਨੂੰ ਦੱਸਿਆ ਸੀ ਕਿ ਉਹ ਹਰਦੀਪ ਨੂੰ ਸਮਝਾਉਣ ਤਾਂ ਕਿ ਉਹ ਘਰ ਵਿੱਚ ਝਗੜਾ ਬੰਦ ਕਰ ਦੇਵੇ। ਸਤਨਾਮ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਉਹ ਪਰਵਾਰ ਦੇ ਨਾਲ ਜਲੰਧਰ ਗਿਆ ਸੀ ਅਤੇ ਪਿਤਾ ਘਰ ਵਿੱਚ ਇਕੱਲੇ ਸਨ। ਇਸ ਮੌਕੇ ਗਿਆਨ ਸਿੰਘ ਉਨ੍ਹਾਂ ਦੇ ਘਰ ਪਹੁੰਚੇ ਤੇ ਕਹਿਣ ਲੱਗੇ ਕਿ ਉਨ੍ਹਾਂ ਦਾ ਬੇਟਾ ਘਰ ਝਗੜਾ ਕਰ ਰਿਹਾ ਹੈ। ਗਿਆਨ ਸਿੰਘ ਅਤੇ ਪਿਆਰਾ ਸਿੰਘ ਦੋਸ਼ੀ ਹਰਦੀਪ ਨੂੰ ਸਮਝਾਉਣ ਦੇ ਲਈ ਉਸ ਦੇ ਘਰ ਗਏ। ਇਸ ਦੌਰਾਨ ਰਾਤ ਨੂੰ ਉਹ (ਸਤਨਾਮ) ਵੀ ਘਰ ਪਰਤ ਆਏ।ਦੇਰ ਰਾਤ ਜਦ ਪਿਤਾ ਘਰ ਨਾ ਪਰਤੇ ਤਾਂ ਉਹ ਹਰਦੀਪ ਦੇ ਘਰ ਗਿਆ ਤਾਂ ਹਰਦੀਪ ਉਸ ਦੇ ਪਿਤਾ ਨੂੰ ਡੰਡੇ ਨਾਲ ਕੁੱਟ ਰਿਹਾ ਸੀ। ਗਿਆਨ ਸਿੰਘ ਨੇੜੇ ਖੜ੍ਹੇ ਹੋ ਕੇ ਤਮਾਸ਼ਾ ਦੇਖ ਰਹੇ ਸਨ। ਉਸ ਨੂੰ ਦੇਖ ਕੇ ਦੋਵੇਂ ਦੋਸ਼ੀ ਫਰਾਰ ਹੋ ਗਏ, ਪਰ ਤਦ ਤੱਕ ਉਸ ਦੇ ਪਿਤਾ ਦੀ ਮੌਤ ਹੋ ਚੁੱਕੀ ਸੀ। ਸਬ ਇੰਸਪੈਕਟਰ ਹਰਪਾਲ ਸਿੰਘ ਨੇ ਦੱਸਿਆ ਕਿ ਦੋਸ਼ੀਆਂ ਦੀ ਗ੍ਰਿਫਤਾਰੀ ਲਈ ਯਤਨ ਜਾਰੀ ਹਨ।