ਚੰਡੀਗੜ੍ਹ, 8 ਫਰਵਰੀ – ਦਿੱਲੀ ਕਰਾਈਮ ਬ੍ਰਾਂਚ ਨੇ ਲਾਲ ਕਿਲ੍ਹੇਵਿੱਚ ਗੜਬੜ ਕਰਨ ਦੇ ਇੱਕ ਦੋਸ਼ੀ ਨੂੰ ਗੁਪਤ ਸੂਚਨਾ ਉੱਤੇ ਚੰਡੀਗੜ੍ਹ ਤੋਂ ਗ੍ਰਿਫਤਾਰ ਕੀਤਾ ਹੈ।
ਪਤਾ ਲੱਗਾ ਹੈ ਕਿ ਕਰਾਈਮ ਬ੍ਰਾਂਚ ਦੀ ਟੀਮ ਉਸ ਦਾ ਪਿੱਛਾ ਕਰ ਰਹੀ ਸੀ। ਉਸ ਨੂੰ ਉਦਯੋਗਿਕ ਖੇਤਰ ਦੇ ਮੰਡੇਲਾ ਲਾਈਟ ਪੁਆਇੰਟ ਦੇ ਨੇੜੇ ਰੈਡ ਲਾਈਟ ‘ਤੇ ਕਾਬੂ ਕੀਤਾ ਗਿਆ। ਦੋਸ਼ੀ ਦੀ ਪਛਾਣ ਹਰਿਆਣਾ ਦੇ ਕਰਨਾਲ ਦੇ ਸੁਖਦੇਵ ਵਜੋਂ ਹੋਈ ਹੈ। ਉਹ ਕਾਰ ਵਿੱਚ ਸੀ। ਦਿੱਲੀ ਕਰਾਈਮ ਬ੍ਰਾਂਚ ਟੀਮ ਸਥਾਨਕ ਪੁਲਸ ਨੂੰ ਦੱਸ ਦੋਸ਼ੀ ਨੂੰ ਨਾਲ ਲੈ ਗਈ ਹੈ। ਸਥਾਨਕ ਪੁਲਸ ਦੇ ਅਨੁਸਾਰ ਦਿੱਲੀ ਦੀ ਕਰਾਈਮ ਬ੍ਰਾਂਚ ਦੀ ਟੀਮ ਇਸ ਦੋਸ਼ੀ ਦਾ ਪਿੱਛਾ ਕਰ ਰਹੀ ਸੀ। ਕਾਰ ਸਵਾਰ ਦੋਸ਼ੀ ਜਦ ਉਦਯੋਗਿਕ ਖੇਤਰ ਦੇ ਮੰਡੇਲਾ ਲਾਈਟ ਪੁਆਇੰਟ ਨੇੜੇ ਪਹੁੰਚਿਆ ਤਾਂ ਰੈਡ ਲਾਈਟ ਹੋ ਗਈ ਅਤੇ ਇਸ ਕਾਰਨ ਉਹ ਲਾਈਟਾਂ ‘ਤੇ ਕਾਰ ਰੋਕ ਕੇ ਗ੍ਰੀਨ ਲਾਈਟ ਦੀ ਉਡੀਕ ਕਰਨ ਲੱਗਾ ਤਾਂ ਕਰਾਈਮ ਬ੍ਰਾਂਚ ਦੀ ਟੀਮ ਨੇ ਉਸ ਨੂੰ ਫੜ ਲਿਆ। ਇਸ ਦੇ ਬਾਅਦ ਇਸ ਦੀ ਸੂਚਨਾ ਲੋਕਲ ਪੁਲਸ ਨੂੰ ਦਿੱਤੀ ਤਾਂ ਪੁਲਸ ਨੇ ਜਾਂਚ ਕਰ ਕੇ ਦੋਸ਼ੀ ਨੂੰ ਦਿੱਲੀ ਕਰਾਈਮ ਬ੍ਰਾਂਚ ਨੂੰ ਸੌਂਪ ਦਿੱਤਾ ਹੈ।ਪੁਲਸ ਦਾ ਕਹਿਣਾ ਹੈ ਕਿ ਇਸ ਕੇਸ ਦੀ ਛਾਣਬੀਣ ਹੁਣ ਦਿੱਲੀ ਪੁਲਸ ਕਰ ਰਹੀ ਹੈ, ਉਨ੍ਹਾਂ ਦਾ ਇਸ ਮਾਮਲੇ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ।
ਦੱਸਿਆ ਗਿਆ ਕਿ ਸੁਖਦੇਵ ਬੀਤੀ 26 ਜਨਵਰੀ ਨੂੰ ਦਿੱਲੀ ਲਾਲ ਕਿਲ੍ਹੇ ‘ਤੇ ਹੋਈ ਗੜਬੜ ਵਿੱਚ ਸ਼ਾਮਲ ਹੋਣ ਕਾਰਨ ਦਿੱਲੀ ਪੁਲਸ ਨੂੰ ਉਸ ਦੀ ਕਾਫੀ ਦਿਨਾਂ ਤੋਂ ਤਲਾਸ਼ ਸੀ। ਉਹ ਚੰਡੀਗੜ੍ਹ ਵਿੱਚ ਲੁਕ ਕੇ ਬੈਠਾ ਸੀ।